“Unidade nu’udar kondisaun estratéjiku hodi hetan vitória ba dezenvolvimentu”
Governu Timor-Leste komemora Loron Proklamasaun Independensia Timor-Leste nian ba dala 37 no Sentenáriu Dom Boaventura iha Luak, Manufahi, iha loron 28, fulan Novembru, tinan 2012.
Prezidente Repúbika, Taur Matan Ruak, iha nia diskursu hateten: “Unidade ita nian, uluk nu’udar kondisaun estratéjiku ida ba vitória no ba restaurasaun independénsia nasionál. Ohin unidade kontinua nu’udar pontu estratéjiku ida ba ita atu hetan susesu ba ita nia objetivu nasionál hodi harii futuru ida kmanek ba ita no ita nia rain. Oras ne’e tempu to’o ona atu fó signifikadu tomak ba independénsia ne’ebé ita hetan, atu bele garante seguransa no moris di’ak ba povu, ita persiza servisu maka’as hodi dezenvolve ita nia rain”.
Taur Matan Ruak husu ba Povu atu la bele tu’ur hodi hateke de’it dezenvolvimentu nasaun nian, maibé povu tenke sai autór no responsávél iha prosesu dezenvolvimentu hodi serbí komunidade. Atu mobiliza sidadaun no sosiedade sivíl sira ita persiza justisa, ita tenke aproveita didi’ak rekursu nasaun nian hodi fahe rikusoin ho di’ak no hanesan.
“Husu ba ita hotu servisu hamutuk no ho laran badinas no sakrifika aan liu tán, hodi bele uza ho di’ak rikusoin ne’ebé nasaun iha atu dezenvolve di’ak liután ita nia ekonomia, hamenus kiak no harii nasaun ida ne’ebé hakmatek no móris di’ak”, Prezidente Repúblika hateten.
Iha Komemorasaun Proklamasaun Independénsia ba dala 37 no Sentenáriu Dom Boaventura nian ne’e, Prezidente Repúblika, inaugura mós estátua, Dom Boaventura nian, iha fatin Luak, Same no iha fatin hanesan entrega mós Medalla Kondekorasaun Dom Boaventura hosi Prezidente da Repúblika ba José Gonçalves Lobato, nu’udar oan hosi Nicolau dos Reis Lobato.
Partisipa iha seremónia komemorasaun proklamasaun independénsia unilaterál ba tinan 37 no sentenáriu Dom Boaventura nian ba tinan atus ida, Prezidente Repúblika, Taur Matan Ruak no espoza, Prezidente Parlamentu Nasionál, Vicente Guterres, Primeiru-Ministru, Kay Rala Xanana Gusmão, Presidente Tribunál Rekursu, Cláudio Ximenes, Prezidente Repúblika Cabo Verde, Jorge Fonseca, Ministru Justisa Cabo Verde, José Carlos Correia, membru Parlamentu Nasionál, eis titulares, Membru Governu, Diretór Jerál sira, populasaun hosi distritu sanulu resin tolu.
