SEPFOPE iha portál eletróniku foun
Sekretáriu Estadu ba Polítika Formasaun Profisionál no Empregu, Ilídio Ximenes da Costa, hamutuk ho Primeira Dama, Isabel Fereira, lansa portál foun ba Sekretaria Estadu Polítika Formasaun Profisionál no Empregu (SEPFOPE) iha loron 16 fulan Novembru 2012 iha Largu Lesidere, Dili, no bele haree iha ninia enderesu www.sepfope.com.
Ilídio Ximenes da Costa iha nia diskursu hateten katak “era ida agora era globalizasaun nian, modernizasaun no teknolojia, bainhira ita ko’alia kona-ba teknolojia, ita mós ko’alia kona-ba informasaun, bainhira ita laiha informasaun ita lakon mós ita nia oportunidade. Informasaun, komunikasaun, edukasaun buat hirak ne’ebé importante iha país ida ne’e atu oinsá ita bele fahe informasaun no fó hanoin ba malu atu hala’o dezenvolvimentu país ida ne’e ba futuru ida próspero liu-liu ba jerasaun foun ne’ebé tuir mai”.
Sekretáriu Estadu informa tan katak “iha portál nia laran, dahuluk, kona-ba simu web. Iha ne’ebá mak ita buka informasaun kona-ba buka servisu no formasaun saida mak alin joven sira no inan-aman sira presiza. Iha mós programa ba diresaun hotu-hotu SEPFOPE nian kona-ba lei no atividade sira. Liuhosi portál ida ne’e mós, ami loke no fahe informasaun ba ita hotu, sé de’it bele fó ninia hanoin, sujestaun no mós krítika, maibé halo krítika ne’ebé konstrutivu atu bele fó aten-barani no dalan ba ami atu avansa liuliu iha tinan 2013 to’o 2017 no nune’e, bele hasa’e no hakbiit liután SEPFOPE atu bele la’o ba oin hodi dezenvolve rai ida ne’e”.
Akompaña Primeira Dama iha serimónia lansamentu ne’e mak Sekretáriu Estadu Ilído Ximenes da Costa, Sekretáriu Estadu Komunikasaun Sosiál, Nélio Isaac, Sekretária Estadu Apoiu Setór Privadu, Veneranda Lemos, Embaixadór sira Austrália no Embaixadór Koreia Sul nian ba Timor-Leste.
Portál ne’e rasik, dezain durante fulan rua, aleinde ne’e, lansa mós blog, twiter no mós facebook SEPFOPE nian.
