Governu Timor-Leste

Sentru Formasaun Téknika iha Komunikasaun (Seftek) promove asaun formasaun ba jornalista sira, hafoin hala’o tiha asinatura Akordu Kooperasaun iha Matéria Komunikasaun Sosiál no protokolu adisionál haat ho Governu Portugál, iha fulan Agostu liubá.

Entre protokolu hirak ne’e, ida ko’alia kona-ba formasaun espesializada ba jornalista sira órgaun Komunikasaun Sosiál Timor-Leste nian, ne’ebé mak asina ona hosi Governu Timor-Leste no Portugál nomós Sentru Protokolár Formasaun Profisionál ba Jornalista sira (Cenjor).

Programa sira ne’e hanorin iha lian portugés, hosi formadór profisionál sira Cenjor nian, no tradutór sira husi Diresaun Nasionál Servisu Tradusaun (DNST) mak halo tradusaun simultánea ba lian tetun.

Hala’o ona asaun formasaun haat (Lian Portugés ne’ebé aplika ba Jornalizmu, Formasaun Formadór Komunikasaun, Formasaun Rádiu ba Rádiu Komunitária sira no Formasaun iha Jornalizmu Ekonómiku) ba profisionál sira na’in 48 hosi órgaun komunikasaun sosiál oioin país nian, maka hanesan RTTL; Timor-Post; Diáriu Nasionál; Semanáriu; Timor Business; Fundasaun Fundu Media; Rádiu Akadémika / UNTL; Rádiu Liberdade / TLMDC no Sentru Rádiu Komunitáriu (SRK).

Asaun formasaun foun kona-ba matéria sira ne’e prevee ba tinan 2013, nomós Formasaun Rádiu ida ba rádiu privada no públika hothotu, no, sei iha tan formasaun ida kona-ba Jornalizmu Asuntu Jurídiku sira nian.

Hamutuk ho Sekretaria Estadu Komunikasaun Sosiál, tuir Akordu Kooperasaun iha Matéria Komunikasaun Sosiál, Seftek prepara daudaun semináriu ida kona-ba komunikasaun no interasaun ho orgaun komunikasaun sosiál ba asesór sira imprensa nasionál órgaun soberania nian, instituisaun públika sira no forsa defeza nasionál nian, ho partisipasaun hosi oradór nasionál no internasionál sira, ne’ebé maka prevee ona ba fulan Dezembru tinan 2012.

Halo parte iha atividade sira formasaun nian, ne’ebé prevee ona maklokek tau-naran nian ba Kursu Komunikasaun  (ba setór públiku) ne’ebé maka sei hahú iha tinan 2013. Atu hetan informasaun hirak ne’e no seluseluktán, konsulta pájina Seftek Timor-Leste (Facebook) nian.