Governu Timor-Leste

Sekretáriu Estadu Komunikasaun Sosiál, Nélio Isaac Sarmento, partisipa nu’udar oradór iha semináriu “Corruption Watchdog Symposium 2012” ne’ebé organiza hosi Asosiasaun Jornalista Timor-Leste (AJTL) no USAID, iha Ministériu Negósiu Estranjeiru, Dili, iha loron 9 fulan Novembru 2012.

Nélio Isaac afirma katak, “Reportajen investigativu nu’udar atividade ida husi jornalista sira atu buka informasaun, kona-ba irregularidade,  abuzu poder ka krimi ruma ne’ebé fó impaktu negativu ba iha sosiedade no nasaun. Informasaun sira ne’e tenke bazeia ba faktu. Tanba ne’e jornalista sira labele hein de’it iha fatin, maibé tenke halo peskiza, halo investigasaun  no entrevista hodi buka hatene informasaun loloos”.

Sekretáriu Estadu ne’e mós subliña liután katak reportajen investigativu bele la’o  di’ak iha nasaun ida, bainhira iha liberdade imprensa. Iha nasaun demokrátiku  ne’ebé de’it, atu garante moris di’ak povu nian  tenke fó informasaun saida de’it ba públiku kona-ba saida mak akontese iha sosiedade.

Média ninia parseiru loloos maka sosiedade ne’ebé hakarak tranparênsia, justisa no tane a’as interese komun, maibé iha ita-nia sosiedade rasik seidauk loke a’an ba média. La informa kona-ba naksalak ruma ne’ebé mosu iha sira nia le’et, tanba sira rasik sei tauk hela impaktu hosi informasaun sira ne’e bele lori risku ba sira-nia aan ka sira-nia negósiu. Maibé sosiedade tenke kolabora ho komunikasaun sosiál hanesan parseiru importante hodi deskobre irregularidade ho baze iha faktu no dadus sira, atu nune’e ajuda autoridade no povu sira simu infórmasaun ne’ebé loos hodi bele kontribui ba prosesu kombate korrupasaun, esplika Nélio Isaac.

Oradór iha Semináriu ida ne’e maka, Sekretáriu Estadu Komunikasaun Sosiál, Nélio Isaac Sarmento, Prokuradora Jerál Repúblika, Ana Pessoa Pinto, Presidente Konsellu Administrasaun RTTL, EP, Expedito Dias Ximenes, Komisáriu Komisaun Anti-Korupsaun, José Neves no Investigadór ONG La’o Hamutuk, Juvenal Dias.