SEPI selebra Loron Nasionál ba Feto Timor-Leste iha sub-distritu Atabae
Sekretaria Estadu Promosaun Igualdade (SEPI) komemora Loron Nasionál ba Feto Timor-Leste nian, iha sub-distritu Atabae, Distritu Bobonaro, ho nia tema “ Partisipasaun Feto iha Tempu Rezisténsia no Ukun Rasik An”
Iha selebrasaun ne’e Vise Primeiru-Ministru (VPM), Fernando La Sama de Araújo hateten, “Ha’u-nia parabéns ba feto timor hakru’uk ba ita nia eroína, Maria Tapo ne’ebé mak ita foti nia loron mate hanesan loron nasionál ba feto timor. Tanba iha tempu ida ohin ita atu halo mós reflesaun katak independénsia ne’e karun, difisil, ita ne’ebé maka moris iha obrigasaun morál atu realiza mehi sira ne’ebé maka sira iha, katak Timor-Leste tenke ukun rasik an ho nune’e ita tenke oferese dezenvolvimentu ida ne’ebé maka di’ak ba povu rai ida ne’e.
Sekretária Estadu Promosaun Igualdade, Idelta Maria Rodrigues haktuir katak, ita hotu-hotu hatene katak tinan-tinan SEPI sempre selebra loron ida ne’e, ho ninia objetivu atu rekoñese no valoriza kontribuisaun feto maluk, Maria Tapo iha luta ba libertasaun rai ida ne’e nian. Husu ba ita hotu-hotu iha fatin ida ne’e tenke koñese, no hatene saída mak uluk nia halo no oinsá maka jerasaun ida agora atu hatutan ba dezenvolvimentu Nasaun ida nian”.
Marka prezensa iha selebrasaun ne’e mak, Vise Primeiru-Ministru, Fernando La Sama de Araújo, Sekretária Estadu Promosaun Igualdade, Idelta Maria Rodrigues, Vise Ministru Solidariedade Sosiál, Jacinto Rigoberto, Sekretáriu Estadu Terras e Proriedade, Jaime Xavier, Deputadu PN Mateus de Jesus, Diretór-jerál Ministériu Justisa, Diretór-jerál MSS, Diretór-jerál SEPFOPE, Adjuntu Administradór distritu Bobonaro, Administradór subdistritu, no xefe suku sira.
