Governu inaugura estrada rurál ne’ebé halo ho alkatraun
Vise Primeiru-Ministru Koordenador ba Asuntu Sosiál, Fernando La Sama de Araújo, akompaña hosi Sekretáriu Estadu ba Polítika Formasaun Profisionál no Empregu, Ilídio Ximenes da Costa, no Vise Ministru Solidariedade Sosiál, Jacinto Rigoberto de Deus, iha loron 19 fulan Outubru inaugura estrada rurál ne’ebé halo ho alkatraun ECO-CURE ho nia distánsia kilómetru lima iha suku Rairobo, subdistritu Atabae, distritu Bobonaro.
Iha serimónia ne’e Sekretáriu Estadu, Ilídio Ximenes da Costa hateten katak, alkatraun ECO-CURE sai mós projetu pilotu SEFOPE nian, no durante ne’e ema hotu hatene SEFOPE loke dalan ho programa dolár 3 no halo manutensaun de’it, maibé agora daudauk tau alkatraun ba estrada. Programa ida ne’e hanesan projetu pilotu ida ne’ebé maka hahú tiha ona iha tinan kotuk liubá no iha fatin tolu maka hahú ona projetu pilotu ne’e, hanesan, suku Rairobo (distritu Bobonaro), distritu Líkisa no Krararas (distritu Vikeke).
“Husu ba komunidade sira atu bele utiliza ho didi’ak estrada ne’e, labele hein de’it programa dolár 3 mai mak hadi’a, maibé tenke hahú hanoin katak projetu ne’e fó benefisiu ba ita rasik, tan ne’e, tenke kuida falisilidade sira ne’e”, apela Sekretáriu Estadu.
Administradór subdistritu Atabae, Sidónio Fontes, hato’o katak, “Lori povu tomak nia naran liu-liu povu suku Rairobo hakarak hato’o respeitu no agradese barak ba Governu Timor-Leste ne’ebé tau ona programa hodi ajuda rezolve problema ne’ebé mak komunidade suku Rairobo enfrenta no mós komunidade suku sira ne’ebé maka halo baliza ho suku Rairobo. Ho inaugurasaun estrada rurál ne’e, bele fasilita ona povu sira iha suku Rairobo no suku sira seluk, tanba ne’e ami husu projetu hadia estrada rurál ne’e bele kontinua nafatin ba iha área seluk distritu ida ne’e nian”.
