Timor-Leste ho Indonézia dezenvolve kooperasaun iha área hakbiit feto
Iha loron 5 fulan Outubru 2012, Governu Timor-Leste reprezenta hosi Sekretária Estadu Promosaun Igualdade (SEPI), Idelta Maria Rodrigues asina Nota Entendimentu ho Governu Indonézia ne’ebé reprezenta hosi Ministra Pemberdayaan Perempuan dan Perlindungan Anak ka KPPPA (Hakbiit Feto no Protesaun Labarik Indonézia), Linda Amalia Sari Gumelar, iha edifisiu Ministériu Pemberdayaan Perempuan dan Perlindungan Anak iha Jakarta, Indonezia.
Liuhusi nota entendimetu ne’e, Governu Timor-Leste ho Governu Indonézia konkorda atu hola medidas ne’ebé nesesáriu hodi promove no dezenvolve kooperasaun iha área hakbiit feto no promosaun igualdade jéneru, aleinde ne’e, sei hala’o kooperasaun mós iha área kapasitasaun institusionál, dezeñu no dezenvolvimentu programa hakbiit feto no promosaun igualdade jéneru; abordajen integrada jéneru no orsamentu responsivu.
Sekretária Estadu Idelta Maria Rodrigues hatutan tan katak, asinatura nota entedimentu ne’e maka sinál hosi kooperasaun ne’ebé sa’e ba beibeik iha área promosaun igualdade liu husi troka esperiénsia no matenek, dezenvolvimenu kapasidade no hakbiit polítika, no iha oportunidade atu hala’o atividade ne’ebé envolve Ministériu Hakbiit Feto no Protesaun Labarik, Universidade Indonesia (UI) Jakarta, Universidade Gajah Mada (UGM) Yojakarta, SEPI, no Universidade Nasional Timor Lorosa’e ne’ebé harii ona Sentru Estudu ba Jéneru.
Atu implementa nota entedementu ne’e, SEPI no KPPPA sei harii Grupu Servisu Konjunta ne’ebé kompostu husi ofisiál relevante husi nasaun rua ne’e. Grupu ne’e sei define prosedimentu, trasa planu, no rekomanda programa kooperasaun hodi atinzi sira-nia objetivu liu husi SEPI no KPPA. Grupu ne’e mós sei monitoriza, avalia, no haree fila fali implementasaun nota entedimentu ne’e no hato’o relatóriu ba SEPI no KPPPA no Komisaun Konjunta ba Kooperasaun Bilaterál Repúblika Indonézia no Repúblika Demokrátika Timor-Leste.
