Ministériu Justisa entrega tan sertifikadu na’in ba rai iha distritu Lautém
Governu konstitusionál ba dalimak liuhosi Vise Ministru Justisa, Ivo Valente, kontinua entrega tan sertifikadu “Na’in ba rai” ba komunidade hamutuk na’in 10, subdistritu Lospalos, distritu Lautém iha loron 28 fulan Setembru.
Ivo Valente, informa, “Estadu halo esforsu atu proteje povu hotu-hotu nia direitu liuhosi V Governu konstitusionál, ho filozofia importante tolu: hatutan, hametin, hadi’a. Hatutan katak Governu sira anteriór halo buat di’ak ne’e ita tenke kontinua, kontinua ezemplu konkretu mak agora ita hala’o daudauk ne’e. IV Governu hahú fahe sertifikadu, Governu ida ne’e kontinua tanba haree ida ne’e di’ak ba povu.
“Mensajen ba povu Lautém, iha IV Governu ida ne’e sei kontinua halo prosesu levantamentu kadastrál to’o 2017 ka liu, bainhira halo levantamentu kadastrál ne’e ami husu ita boot sira nia kolaborasaun atu bele mai kolobora ho onestidade no servisu hamutuk Diresaun Terras Propriedades Lautém ninian”, apela Vise Ministru.
Administradór distritu Lautém, Jeferino Sequeira informa mós, “iha inisiu ita hahú, mosu ona problema, tanba iha preokupasaun no lamentasaun barak maibé ho pasiénsia, Diresaun Terras Propiedades servisu kadastrál distritu Lautém kolabora hamutuk ho lider komunitária no entidade sira hotu no ohin loron ita bele realiza atividade ida ne’e”.
Jeferino Sequeira haktuir tan, “Ko’alia kona-ba asuntu rai, asuntu ida ne’ebé importante no asuntu ida ne’ebé hamosu lamentasaun barak tanba ida ne’e ami hein atu ita boot sira liuliu hosi Ministériu ne’ebé marka prezensa iha ami nia leet bele esplika no sensibiliza regulamentu ba komunidade sira atu nune’e sira bele hatene saida maka sira-nia direitu no saída maka sira-nia devér .
Iha oportunidade ne’e, ha’u hato’o parabéns ba ita boot sira ne’ebé hetan sertifikadu no ba ita boot sira ne’ebé karik seidauk hetan oportunidade la’ós dehan katak para ona, tanba prosesu ne’e sei la’o to’o tempu ita boot sira hetan direitu, dehan Administradór distritu.
Marka prezensa iha serimónia ne’e, Vise Ministru Justisa, Ivo Jorge Valente,Sekretáriu Estadu Terras Propriedade, Jaime Xavier Lopes, Administradór Distritu Lautém, Jeferino Sequeira, Komandante PNTL Distritu Lautém, autoridade lokál no komunidade sira.
