Governu Timor-Leste

Sekretaria Estadu Polítika Formasaun Profisionál no Empregu (SEPFOPE), organiza semináriu internasionál ba Formasaun Profisionál iha Timor-Leste durante loron rua (hahú husi loron 20 to’o 21 fulan Setembru), iha Komoro, Díli, ho nia tema jerál: “Kria oportunidade no dezenvolvimentu kualidade servisu iha Timor-Leste”.

Objetivu hosi semináriu ne’e maka, dahuluk atu fahe esperiénsia hosi péritu parseiru dezenvolvimentu sira hosi nasaun viziñu (hanesan Austrália, OIT, AUSAID, Portugal, Brasil, ADB) no parseiru rai laran ne’ebé durante ne’e fó tulun ba formasaun profisionál iha Timor-Leste. Daruak, fahe esperiénsia kona-ba servisu ne’ebé dezenvolve iha SEFOPE durante tinan lima liubá, liu-liu iha área formasaun profisionál no área seluk ne’ebé relevante.

Iha abertura ba semináriu ne’e, Vise Primeiru-Ministru Koordenadór ba Asuntu Sosiál, Fernando La Sama de Araújo hateten katak “ha’u fiar no konsiente katak semináriu hanesan ne’e importante tebe-tebes. Ita konvida maluk sira ne’ebé ho esperiénsia boot no koñesimentu kle’an ba área formasaun, treinu, ne’e importante tebe-tebes. Ha’u hakarak afirma iha ne’e katak ita boot sira ne’ebé maka fó ona kontribuisaun durante ne’e, ho organizasaun sira seluk, hatene duni ami-nia nesesidade hanesan nasaun foun ne’e”.

“Agora Timor-leste iha era ida agora ne’e era kompetisaun, kompete duni iha servisu ne’ebé mak ita servisu ba no Timor tenke prepara an atu kompete ho joven sira, sidadaun sira hosi rai seluk, imi hatene la kleur ita hola parte ona iha ASEAN, ASEAN ita hola parte ona ema Vietnam no Malaysia mós mai servisu iha Timor, ita mós bele bá servisu iha ne’ebá ladún difísil hanesan agora, maibé bainhira ita-nia kapasidade laiha mak ema sei domina fatin hotu-hotu.

Sekretáriu Estadu Polítika Formasaun Profisionál no Empregu, Ilídio Ximenes da Costa, informa katak “iha semináriu loron rua ne’e, ita bele hetan esperiénsia ruma hodi responde ba nesesidade ne’ebé mak ita nasaun foun enfrenta, hanesan ita hotu hatene Timor-Leste foin kompleta tinan 13, moris hanesan nasaun foun, país foun, hanesan nasaun ida ne’ebe maka joven hela, buat barak sei falta, falta iha abilidade, falta iha matenek, falta mós iha parte sira seluk tan, ho falta sira ne’e maka dada ita ohin loron atu fó motivasaun hodi ita haree ba oin oinsá atu responde buat sira ne’e, atu hahú hanoin ba futuru ne’ebé maka di’ak liu”.

Marka prezensa iha abertura semináriu ne’e maka, Vise Primeiru-Ministru Asuntu Sosiál, Fernando La Sama de Araujo, Ministru Edukasaun, Bendito dos Santos Freitas, Sekretáriu Estadu Polítika Formasaun Profisionál no Empregu, Ilídio Ximenes da Costa, no Sekretária Estadu ba Apoiu no Promosaun Setór Privadu, Veneranda M. Lemos.