Governu Timor-Leste

Governu Timor-Leste liu hosi Ministru Justisa, Dionísio Babo, iha loron, 10 fulan Setembru tinan 2012, entrega sertifikadu “na’in ba rai” ba ema na’in 10 husi distritu Ermera.

“Timor-Leste hanesan mós nasaun hotu-hotu, iha problema importante ida ba estabilidade nasionál mak estatutu legál ida kona-ba rai, ne’ebé bele kauza instabilidade no insegurança iha rai hotohotu iha mundu ne’e la’os iha Timor de’it. Tanba ne’e ha’u agradese ba IV Governu Konstitusionál ne’ebé servisu hamutuk ho USAID hodi bele halo levantamentu kona-ba na’in ba rai, inklui distritu Ermera”, informa Dionísio Babo.

Ministru Justisa hatutan IV Governu Konstitusionál hala’o polítika ida hodi halo levantamentu iha territóriu Timor-Leste nia laran tomak no konsege duni rejista propriedade rai nian parsela ki’ik no boot hamutuk rihun lima nulu: “ita hein katak iha tinan sira mai ne’e, ita bele halo levantamentu barak liu tan hodi bele fó rekuñesimentu ba ema idaidak nia rai tuir direitu na’in ba rai”.

Iha biban ne’e, administradór distritu Ermera, Victor Santos, husu ba Ministru Justisa bele karik iha programa oin mai atu fó kontinuidade ba programa“na’in ba rai” ne’ebé eis Ministra hala’o tiha ona.

Marka prezensa iha serimónia ne’e, Ministru Justisa, Dionísio Babo, Vise-Ministru Justisa Ivo Jorge Valente, Sekretáriu Estadu Terra Propriedade, Jaime Xavier Lopes, Defensór Públiku, Sérgio Ornai, Komisária Direitu ba Labarik, Administradór distritu Ermera, Victor Santos no Komandante PNTL distritu Ermera nian.