Sorumutu Xefe Estadu-Maiór Jenerál Forsa Armada País KPLP nian ba dala 14º
Xefe Estadu-Maiór Jenerál Forsa Armada País sira KPLP nian iha Ministériu Defeza no Seguransa, hala’o sorumutu iha Fatuhada Díli, iha loron 18 fulan Agostu tinan 2012.
Primeiru-Ministru, Kay Rala Xanana Gusmão iha nia diskursu ba sorumutu ida ne’e, hatete katak, Timor-Leste ohin loron moris iha pás no instituisaun ne’ebé mak hili ona tuir dalan demokrasia nian, dezenvolve sira nia atividade hodi respeita loloos ba norma konstitusionál sira konforme prova ona iha eleisaun prezidensiál no lejizlativa sira, ne’eb’e maka dala ida tan hatudu maturidade no sivizmu povu timoroan nian.
Xanana Gusmão tenik tan katak laiha pás sein demokrasia, maibé verdade mós katak laiha dezenvolvimentu bainhira laiha demokrasia, no nune’e karik, laiha pás. Tanba ne’e maka Timor-Leste hakarak duni implementa sira nia Planu Estratéjiku ba Dezenvolvimentu ne’ebé maka sei hala’o durante tinan 20 nia laran ho objetivu atu ita bele sai husi kondisaun país subdezenvolvidu ho rendimentu kiik liu ba nasaun ida ne’ebé ho rendimentu médiu-altu nian, iha tinan 2030, hodi esplora tomak potensialidade materiál no umana.
Primeiru-Ministru hatete mós katak timor-oan sira presiza hasa’e sira nia hanoin husi kedas análize to’o ba planementu, husi preparasaun to’o ba kapasitasaun rekursu umanu sira iha nível hotu-hotu Forsa Armada sira nian, nune’e bele hatan ba dezafiu atuál ne’ebé sira hasoru no nia mós hatete katak Forsa Defeza Timor-Leste sei iha faze kresimentu no ninia kapasitasaun no valorizasaun nu’udár prioridade ida iha polítika Governu ida ne’e nian.
Iha biban hanesan, Majór Jenerál Lere Anan Timur hatete mós katak Forsa Defeza Timor-Leste tama ona iha faze inisiál ida ba dezenvolvimentu no ho realizasaun sorumutu ida ne’e kontribui ba dezenvolvimentu no atu reforsa relasaun ne’ebé mak hamutuk ona ita.
Partisipa iha Sorumutu ne’e, Xefe Estadu-Maiór Forsa Armada KPLP nian, Embaixadór sira Portugál no Brazíl, Reprezentante Sekretariadu Permanente ba Asuntu Defeza KPLP, Diretór ba Sentru Análize Estratéjiku KPLP no Membru Delegasaun sira.
