Governu Timor-Leste

Prezidente Repúblika iha kuarta-feira, loron 8 fulan Agostu tinan 2012, fó pose ba V Governu Konstitusionál iha Palasiu Nobre, Lahane, Dili,Timor-Leste.

Hafoin simu pose Primeiru-Ministru V Governu Konstitusional, Kay Rala Xanana Gusmão, iha ninia diskursu hateten: “Ita hatene katak verdadeira riqueza ka riku-soi lolós ita-nia Nação nian, mak itania povo rasik. Nuné maximização iha saúde, iha educação, iha cultura no iha qualidade moris timoroan tomak nian, mak fundamental ba construção nação nebé justa no progressiva. V Governo Constitucional sei haka’as-an hodi hadi’a prestação serviços iha áreas fundamentais rua, mak hanesan: saúde no educação”.

V Governu Konstitusionál kompromete an katak sei sai nu’udar mákina ba progresu dezenvolvimentu nasaun ne’e nian, tenke asume espíritu responsabilidade, dedikasaun onestidade, persisténsia no korajen, “Ho razão ida ne’e, mak ha’u apela mos ba participação husi jovens sira hotu. Geração idaidak iha nia papel atu desempenha, iha nia tempo rasik, hodi hasoru desafios barabarak nebé sei mosu iha Timor-Leste. Jovens sira tenke assume luta foun ida né: luta atu dezenvolve ita nia país, husi esforço atu hametin paz no haburas valores democráticos iha ita-nia sociedade laran”, hatutan Primeiru-Ministru Kay Rala Xanana Gusmão.

Atu haree alokusaun Primeiru-Ministru nian, favor ida, hanehan iha ne’e.

Prezidente Repúblika, Taur Matan Ruak, iha nia diskursu  tomada pose ne’e haktuir katak “V Governu Konstitusionál tenke transforma mehi ne’ebé mak ita iha, sai ba realidade atu nune’e bele lori benefisiu ba povu no timor-oan tomak. Ha’u nia parabéns ba ita-boot sira hotu, no hein katak dezafiu sira ne’ebé iha, ita hotu hamutuk ho hanoin ida de’it, reuni esforsu, no vontade hodi bele ultrapasa  iha tinan lima mai  ne’e tenke moderniza ita-nia infraestutura, aselera mós prosesu dezenvolvimentu produtivu nian”.

Marka prezensa iha tomada pose ne’e maka, Prezidente Repúblika Taur Matan Ruak, Prezidente Parlamentu Nasionál, Vicente Guterres, eis Prezidente Repúblika José Ramos-Horta, Reprezentante Sekretáriu Jerál Nasõens Unidas iha Timor-Leste, Finn Rieske Nielsen, Komisáriu UNPOL, Luis Carrilho, Prokuradór Jerál Repúblika, Ana Pessoa Pinto, Xefe Estadu-Maiór F-FDTL, Majór Jenerál, Lere Anan Timur,  Komandante Jerál PNTL, Komisáriu Longuinhos Monteiru, Bispo Diocese Dili, Dom Alberto Ricardo da Silva, Korpu Diplomátiku no Partidu Politiku sira.