SEFOPE Lansa Relatóriu Implementasaun Progrma 2007–2012
Sekretáriu Estadu Profisionál no Empregu (SEFOPE), Bendito Freitas akompaña hosi Sekretária Estadu Promosaun Igualdade (SEPI), Idelta Maria Rodrigues hanesan mós reprezentante Primeiru-Ministru Interinu, iha loron 31 fulan Jullu, halo publikasaun relatóriu implementasaun programa 2007-2012, livru ho nia títulu “Cinco Anos na Marcha Com O Povo Para O Desenvolvimento (2007-2012)”.
Sekretáriu Estadu, Bendito Freitas iha diskursu hateten katak, serimónia ohin iha objetivu importante rua, dahuluk, maka halo lansamentu ba relatóriu tinan 5 atividade ne’ebé SEFOPE hanesan instituisaun Governu ligadu ho Governu Konstitusionál IV hala’o no daruak, agradesimentu ba mós tinan lima prestasaun servisu SEFOPE, ha’u rasik hamutuk ho funsionáriu SEFOPE ho parseiru dezenvolvimentu sira, tripartidu hotu-hotu ne’ebé kontribui atu halo buat ruma hodi lori transformasaun, lori mudansa ba ita-nia nasaun, ita-nia Estadu Timor-Leste.
Sekretáriu Estadu informa tan katak, SEFOPE iha tinan lima nia laran halo duni nia servisu ho susesu ne’ebé boot atinji objetivu ne’ebé importante tebe-tebes hodi hasa’e kapasidade ba ita-nia joven timor oan rihun lubuk ida, kria mós kampu traballu ne’ebé fasilita ita-nia komunidade sira iha área rurál atu bele iha ligasaun ho sira liu-liu iha infraestrutura bázika, atu fasilita sira-nia nesesidade ekonómika mak hanesan edukasaun, saúde, no mós nesesidade importante atu bele hadi’a sira-nia vida, espesialmente formasaun ba joven hanesan xave ne’ebé SEFOPE dezempeña ho determinasaun.
Iha serimónia ne’e hala’o mós lansamentu ba portál Observatóriu Merkadu Traballu Nasionál ho nia enderesu www.omtn.gov.tl ne’ebé fó informasaun kona-ba dadus dezempregu, empregu, formasaun no dadus ne’ebé relevante ho servisu SEFOPE nian, aleinde ne’e, entrega mós sertifikadu resgistrasaun ba sentru formasaun sira ne’ebé hetan ona akreditasaun, mak hanesan, Sentru Formasaun Téknika Komunikasaun, SEKM,Institutu Apoiu Dezenvolvimentu Emprezariál (IADE), Sentru Vokasionál Juventude Komoro, Sentru Treinamentu Vokasionál Juventude Bairro-Pite, Sentru Treinamentu Vokasionál Juventude Manatutu, Sentru Treinamentu Juventude Kamea, Sentru Formasaun Sekretariada no Kustura, Fuiloro.
Marka prezensa iha serimónia ne’e mak, Reprezentante espesiál Embaixada Austrália nian liu-liu Ajénsia Austrália ba Dezenvolvimentu Internasionál, Organizasaun Internasionál Traballu, parseiru sira hotu tripartidu, konfederasaun sindikatu TL, Emprezáriu, diretór-jerál, diretór no funsionáriu SEFOPE.
