SEPI Lansa Portál www.sepi.gov.tl
Sekretária Estadu Promosaun Igualdade (SEPI), Idelta Maria Rodrigues iha loron 26 Jullu 2012 iha Otél Timor, ofisialmente lansa portál ho ninia enderesu www.sepi.gov.tl .
“Iha informasaun badak ida ne’e ita sei haree fila fali iha ita ninia portál, formasaun lubuk boot ida ba situasaun feto sira ne’ebé durante ita halo períodu tinan 10 nomós iha tinan lima governasaun AMP, ita boot sira sei haree rasik iha portál, atu nune’e labele loroloron tenke ba hasoru Sekretáriu Estadu Promosaun Igualdade nia funsionáriu sira, hodi bele hatene di’ak liu tan saida mak durante ne’e feto sira halo, situasaun feto Timor-Leste iha kada setór agora ita iha ne’ebé”, hateten Idelta Maria Rodrigues.
“Ita hotu-hotu hatene katak oras ne’e ita tenke akompaña mundu globalizasaun ne’ebé modernizadu ho kompetisaun maka’as tebe-tebes bainhira ita ukun an maibé ita la aselera ita-nia prosesu dezenvolvimentu liuhosi meiu komunikasaun ne’ebé di’ak ne’e sai problema boot ida ba dezenvolvimnentu rai ne’e nian, tanba ne’e ita uza oportunidade ida ne’e atu bele haree rasik hodi la dúvida ba saida mak ita temi kona-ba área igualdade jéneru,” esplika Sekretária Estadu.
Sekretáriu Estadu Polítika Enerjétika, Avelino Coelho, reprezenta Primeiru-Ministru, informa mós katak, lansamentu portál iha kontestu atu desimina la’ós de’it atividade ne’ebé mak SEPI halo maibé mós lori espasu atu ita hotu bele aproveita, akompaña informasaun kona-ba Timor-Leste liuhosi SEPI nia atividade. Portál ne’e design (dezeñu) hanesan espasu ida atu ema hotu bele akompaña, bele lee, bele monitoriza atividade ne’ebé mak halo, atividade ne’ebé mak dezenvolve ona no bele fó informasaun no mós hotu-hotu bele partisipa iha debate.
