Governu Inaugura Postu Fronteirisu Salele (Covalima)
Governu Timor-Leste liu hosi Vise Primeiru-Ministru José Luis Guterres, akompaña hosi membru Governu, iha loron 26 fulan Juñu 2012, inaugura Postu Fronteirisu Integradu no edifísiu diresaun nasionál jestaun patrimóniu estadu iha fronteira, Salele,Distritu Covalima.
Serimónia ne’e hahú uluk ho inspesaun hosi membru Governu ba fatin refere hafoin asina plaka hosi vise Primeiru-Ministru no entrega xave hosi kompañia BTK ba Governu tuir kedas ho bensaun hosi Amu pároku ba postu fronteira ikus liu halo demostrasaun ekipamentu informátika,sistema seguransa no raiu-x hosi ekipa téknika sira.
Vise Primeiru-Ministru, José Luis Guterres, iha ninia diskursu hateten katak, Postu integradu ida ne’e halo atu ita iha relasaun di’ak ho ema negosiantes sira ne’ebé tama iha ita nia rai laran, tanba hanesan ita hotu hatene, Timor-Leste iha kontestu nasionál ida buka esforsu an hela atu sai nu’udar membru ASEAN, bainhira ita iha postu integradu, ita bele kontrola ona sasán sira ne’ebé tama ilegál iha rai laran, ho inaugurasaun ne’e mós ita fó kontribuisaun ida boot tebe-tebes iha prosesu adezaun ba nasaun ASEAN nian.
José Luis mós hatutan tan katak, Ha’u lori naran Governu tomak fó parabéns ba iha komisaun organizadora ne’ebé lidera hosi Vise Ministru Finansa nomós ba iha emprezáriu sira, ba kompañia Karya Timor nomós ba sira tomak ne’ebé fó kontribuisaun para ita nia postu integradu ne’e sai postu ida di’ak tebe-tebes, ita bele dehan katak mezmu kiik,maibé tuir padraun internsionál nian.
Administradór Distritu Covalima, Inácio da Silva Pires, iha ninia intervensaun hateten katak,inaugurasaun postu integradu iha mota masin ne’e, hanesan fatin importante ida ne’ebé Governu Timor-Leste halo atu hasa’e fasilidade servisu iha komunidade Tilomar, liuliu ba ema ne’ebé ba-mai liuhosi postu fronteira entre Distritu Covalima no Atambua, Timor Osidentál
Fasilidade ka ekipamentu sira ne’ebé iha postu ida ne’e, ita hotu-hotu iha obrigasaun atu kuidadu, atu nune’e bele dura ba tempu naruk, nomós ha’u hakarak fó hanoin fali ba maluk sira hosi Indonézia atu ita bele loke fila fali bazar iha ne’e, tenik Inacio da Silva Pires.
Serimónia inaugurasaun ne’e hetan partisipasaun hosi vise Primeiru-Ministru José Luis Guterres,vise Ministru Finansa Rui manuel hanjam,Sekretáriu estadu seguransa Francisco Guterres,adjunto komandante jerál PNTL Afonso de Jesus, administradór distritu no sub-distritu, xefe suku no Autoridade sira hosi Kabupaten BELU, NTT, Indonézia.
