Governu Timor-Leste

MAP Liuhusi Diresaun Nasionál Peska no agrikultura, iha loron 14 fulan Juñu tinan ne’e iha salaun Ministériu Agrikultura no Peska nian, Komoro, Dili, halo lansamentu ba portál kona-ba estatístika peska nian ho ninia enderesu www.peskador.org

Ministru Agrikultura no Peska Internu,  Marcos da Cruz, esplika katak, fundu ba projetu portál peska nian ne’e, mai hosi Governu España, no portál ne’e ninia objetivu atu dezenvolve informasaun sira kona-ba peska iha Timor-Leste,  ne’ebé oras ne’e daudaun dezenvolve ona hosi projetu RFLP (Regional Fisheries Livelihoods Programme) servisu hamutuk ho MAP liu-liu Diresaun Nasionál Peska.

Iha fatin hanesan, Diretór-Jerál, MAP, Lourenço Borges Fontes, informa mós katak portál ne’e hanesan oportunidade boot ida ba ita hotu, atu nune’e ema hotu-hotu bele hetan asesu ba infomasaun kona-ba peska nian no lei sira ne’ebé regula kona-ba atividade peska nian.

Marka prezensa iha lansamentu ne’e mak, Ministru Agrikultura no Peska Interinu, Marcos da Cruz, Diretór-Jerál MAP, Lourenço Borges Fontes, Diretór Nasionál Ministériu Justisa, Francisco Cárceres, reprezentante hosi Ministériu Finansa, Diretór Nasionál RFLP no parseiru dezenvolvimentu hosi ajénsia FAO.