Governu Timor-Leste

Ministériu Agrikultura no Peska (MAP), Universidade Nasionál Timor Lorosa’e (UNTL) no Governu Austrália iha loron 18 fulan juñu, iha salaun MAP, Komoro, Dili, asina nota entendimentu ida atu dezenvolve Agro-pekuária iha Timor-Leste, no iha tempu hanesan  halo lansamentu mós ba projetu iha área agro-pekuária nian.

Iha serimónia ne’e, Sekretáriu Estadu Agrikultura no  Arborikultura, Marcos da Cruz, informa katak, Governu Austrália fó apoiu orsamentu ne’e, liuhosi Australian Centre for International Agricultural Researh (ACIAR) kuaze dolár austrália rihun neennulu, hodi fahe ba Ministériu Agrikultura no Peska no Universidade Nasionál Timor Lorosa’e hodi dezenvolve  área pekuária liuhosi projetu peskiza nian”.

Sekretáriu Estadu, haktuir tan katak, peskiza ne’e sei envolve peskizadór hosi MAP, liu-liu husi Diresaun Nasionál Peskiza nian no UNTL, hodi hala’o atividade ne’e ho durasaun tinan 3 hahú tinan 2012 to’o 2015 iha Sentru Peskiza ne’ebé estabelese ona no mós fatin seluk ne’ebé mak poténsia bo’ot ba área pekuária hanesan Distritu Lautem.

Aleinde ne’e, iha Peskiza ne’e mós sei involve peskizadór hosi Australian Centre for International Agricultural Researh (ACIAR) ne’e rasik, no, sira sei fó rekomendasaun mai Governu atu bele halo planu ba dezenvolvimentu setór pekuária iha Timor Leste, dehan Sekretáriu Estadu.

Embaixadór Austrália Miles Armitage, haksolok tebes iha lansamentu ne’ebé hala’o, hodi bele hasa’e produsaun pekuária ne’ebé di’ak ba iha futuru Timor-Leste.

Partisipa iha serimónia ne’e mak Sekretáriu Estadu Agrikultura no Arborikultura Marcos da Cruz ne’ebé reprezenta Ministru Agrikultura no Peskas, embaixadór Austrália iha Timor Leste, reprezentante ACIAR, Reitór UNTL, Diretór Nasionál inklui xefi departamentu sira.