Hahú servisu atu implementa periódu estraordináriu ba Promosaun sira ba PNTL
Komisaun Estraordinária ba Promosaun ho Sekretáriu Estadu Seguransa, hasoru malu iha loron 1 fulan Juñu tinan 2012, iha Sekretaria Estadu Seguransa, iha Díli, hodi hahú servisu preparasaun nian ba periódu estraordináriu ba promosaun iha Polísia Nasionál Timor-Leste (PNTL)
Komisasun estraordinária ba Promosaun ne’e forma bazeia ba dekretu lei no. 22/2012, loron 23 fulan Maiu, ne’ebé kompostu hosi Membru Komisaun Akompañamentu ba Prosesu Promasaun iha PNTL no membru sira Komisaun Promosaun PNTL nian, ho sira nia funsaun atu lidera prosesu promosaun nian.
Promosaun ne’e sei halo ba postu sira hanesan, sarjentu to’o superintendente, ne’ebé mak sei hala’o iha tempu badak.
Prezidente Komisaun Estraordinária ba Promosaun, Isabel da Costa Fereira, hateten, iha sorumutu ne’e, aprezenta servisu Komisaun Akompañamentu ba Prosesu Promasaun no servisu Komisaun Estraordináriu nian ba Sekretáriu Estadu, no iha tempu badak, komisaun Estraordináriu sei anusia ba Polisia Nasionál Timor-Leste (PNTL), kona-ba vaga hira mak iha proposta nia laran.
Sekretáriu Estadu Seguransa, Francisco Guterres, hodi IV Governu Konstitusionál nia naran agradese ba Komisaun Akompañamentu ba Prosesu Promosaun ne’ebé hala’o sira nia servisu di’ak tebes, hodi identifika problema sira ne’ebé mak mosu , atu nune’e bele ajuda Governu hodi rezolve.
