Governu Timor-Leste

Komisaun Funsaun Públika iha loron 1 fulan Juñu 2012, iha Sentru Konvensaun Díli, organiza sorumutu Nasionál dalimak ba okupante kargu diresaun no xefia sira iha Administrasaun Públika Timor-Leste nian, ho Primeiru-Ministru, Kay Rala Xanana Gusmão.

objetivu hosi sorumutu ne’e atu fó oportunidade ba reprezentante diresaun jerál sira hosi Ministériu no Sekretaria Estadu,  Administradór Distritu no sub-distritu hodi halo reflesaun krítika ida ba atividade sira ne’ebé implementa tiha ona, no diskute kona-ba espetativa no prioridade sira iha futuru no aprezenta rekomendasaun sira ba Governu foun ne’ebé atu mai.

Prezidente Komisaun Funsaun Públika (KFP), Libório Pereira, hatete katak, durante mandatu  IV Governu Konstitusionál aprova ona rejime oioin no dekretu - lei  sira ne’ebé kontribui ba funsionamentu di’ak funsaun públika nian. Rejime  sira ne’e maka hanesan suplementu remuneratóriu,rejime tranzisaun seguransa ba vellise, invalidés no ba traballadór sira estadu nian,dekretu-lei ba formasaun no dezenvolvimentu, no  iha mós mandatu IV Governu nian konverte traballadór temporáriu sira hamutuk liu rihun sanulu resin tolu ba funsionáriu públiku permanente,kontribui nune’e ba estabilidade servisu públiku nian .

Primeiru-Ministru, Kay Rala Xanana Gusmão, iha nia intervensaun hatete katak, “ohin ita hasoru malu hanesan dahikus iha mandatu IV Governu Konstitusionál, tanba ne’e ,ita hotu temi beibeik  hatene ona  iha tinan sanulu nia laran katak pilar estadu mak orgaun soberania rin haat,  konstrusaun estadu  ne’e sai hanesan pilar importante ida ba iha orgaun soberania estadu nian, maibé pilar ne’e importante tebes ida maka makina estadu, maka ita-boot sira,tanba ne’e ita hamutuk iha ne’e atu servi , ita  hamutuk iha ne’e atu kompriende nafatin katak ita pilar boot ida iha konstrusaun estadu nian”.

IV Governu Konstitusionál ne’ebé hala’o servisu atu servi ita nia rai ho ita nia povu. Ohin ita hamutuk iha ne’e atu haree buat balun di’ak, no mós  buat barak  mós ladún di’ak  no ita rekoñese ita nia sala atu bele hadia. Ami mós rekomenda ba imi, atu sai ami simu imi nia rekomendasaun hotu,maibé ha’u apela ba imi atu hadia nafatin imi nia profisionalizmu ne’ebé ita temi beibeik, hodi tau iha imi nia ulun promosaun tuir méritu hodi hametin imi, ne’e importante tebes. Tenik Primeiru-Ministru Kay-Rala Xanana Gusmão.

Sorumutu ne’e organiza hosi Komisaun Funsaun Públika(KFP) konta ho prezensa, Prezidente Repúblika, José Maria Vasconcelos “Taur Matan Ruak’’,Primeiru-Ministru,Kay-RalaXanana Gusmão,membru Governu,Prezidente Komisaun Funsaun Públika(KFP), Diretór Jerál sira, Diretór Nasionál no Xefe Departamentu sira hotu.