Governu Timor-Leste

Aniversáriu Restaurasaun Inpendénsia Timor-Leste nian ba dasanuluk, ofisialmente komemora ho realizasaun eventu oioin, ne’ebé mak hala’o durante fulan Maiu nia laran. Pontu a’as liu iha selebrasaun ne’e mak iha, 19 kalan atu tama ba loron 20 fulan Maiu nian, iha Tasi Tolu, ho fó pose ba Prezidente Repúblika eleitu, José Maria Vasconcelos (Taur Matan Ruak).

Atu lé notisia kona-ba serimónia fó pose nian, klik iha ne’e.

Prezidente Repúblika, Taur Matan Ruak, iha diskursu hateten, “Iha 20 Maiu 2002 ita hahú prosesu kompleksu hodi harii Estadu, harii instituisaun sira no responsabiliza timor-oan sira hodi kaer rasik sira‐nia Estadu. Iha data ida‐ne’e, tinan sanulu liubá, ita simu ita‐nia nasaun nia destinu hosi ONU nia liman, liu tiha tinan rua ho balun ho administrasaun internasionál. Ha’u hakarak aproveita oportunidade ida‐ne’e atu hato’o OBRIGADU barak ho ami‐nia laran tomak ba Organizasaun Nasoins Unidas, ba feto no mane sira ne’ebé hola parte iha misaun sira ida‐idak, ba nasaun sira ne’ebé halo posível atu konstitui misaun sira‐ne’e, ne’ebé fó sira‐nia apoiu ba Timor‐Leste atu moris hi’as nu’udar Nasaun no nu’udar País.

Taur hatutan tan katak, “Iha tinan ida‐ne’e, désimu aniversáriu, ita sei mós haree misaun ONU sai hosi ita‐nia nasaun, nu’udar forsa pás nian, forsa manutensaun pás no hodi fó apoiu ba konstrusaun Estadu nian. Ha’u fiar katak komunidade internasionál sei aseita atu mantein misaun ONU ki’ikoan ida iha ne’e. Maibé misaun ne’e sei sai misaun polítika ida hodi fó apoiu ba prosesu transformasaun iha ita‐nia nasaun, ba ninia dezenvolvimentu”

“Bainhira ita haree ba ita‐nia nasaun agora, hafoin liu tiha tinan sanulu, ita sente orgullu ba buat hotu‐hotu ne’ebé alkansa no harii tiha ona hosi ita‐nia responsabilidade no ho apoiu, asisténsia no kooperasaun internasionál”, Tenik Taur Matan Ruak

Serimónia ne’e diriji hosi Prezidente Repúblika foun, José Maria Vasconselhos, “Taur Matan Ruak”  no partisipa hosi Prezidente Parlamentu Nasionál, Fernando Lasama de Araújo, Primeiru-Ministru, Kay Rala Xanana Gusmão, Prezidente Tribunál Rekursu, Cláudio Ximenes, Prezidente Repuplika Indonézia, Susilo Bambang Yudhoyono ho Espoza, Prezidente Portugál, Prof. Anibal Cavaco Silva ho Espoza, Governadora Jerál Austrália nian, Quentin Bryce, Governadór-Jerál Nova Zelândia, Sr. Lt.Gen Rt.Hon Sir. Jerry Mateparae, Governadór Jerál Tuvalo nian, Sir Iakoba Italeli, GCMG, membru Governu sira, reprezentante Sekretáriu Jéral Nasoins Unidas nian iha Timor-Leste, Ameerah Haq, Korpu Diplomátika, konfisaun relijiozu, no povu Timor-Leste.

Hafoin serimónia iha Palásiu Prezidente, iha loron hanesan, loron 20 fulan Maiu 2012, inaugura mós Arkivu no Muzeu Rezisténsia Timor-oan sira nian, iha Díli.