Governu Timor-Leste

Governu Timor-Leste, liuhosi  desizaun Konsellu  Ministru nian, haruka  Ministru Saúde, Nelson Martins,  ba Londres, Inglaterra,   hodi halo  vizita   ba  Jornalista Max Stahl,  ne’ebé  mak baixa  hela  iha  Ospitál  Real   Mushin nian, iha  Chelsea.

Iha  Konferénsia  Imprensa, bainhira fila  hikas  husi  Inglaterra, Ministru Saúde  hato’o  ba  jornalista  sira  katak,  Governu mak delega nia “hanesan enviadu  espesiál  atuhodi  observa  rasik  ita  nia  kompañeiru luta nian, Mak  Stahl.  Ha’u  to’o  iha  Londres  iha loron  25  fulan  Abril,  no  halo  kedas  vizita  ba  señor  Max  Stahll  no  nia  kaben  Dra. Ingrid,  médika  espesialista Pediatria  iha  Ospitál  Nasional  Guido  Valadares, Díli”.

Nelson  Martins  buka  hatene  kedas  situasaun  Max  Stahl  hamutuk  ho  médiku  ne’ebé   mak  responsabiliza,  ne’ebé  konfirma gravidade  ba nia  estadu  saúde,  tanba  moras ho tempu naruk  mak  oras  ne’e  sei  submete  hela  ba  tratamentu.

Ministru  fo  hatene  katak  Max  Stahl  tenke  permanese  iha  Londres  durante fulan Jullu  no  Agostu,  hodi halo tratamentu ida  regular,  hafoin bele  fila  hikas  mai  Timor-Leste.

Ministru  Saúde,  hatutan  tan  katak,  jornalista  Max  Stahl  ne’e  mak  divulga  ba  mundu  tomak  imajen  masakre  Semitériu  Santa  Kruz,  iha  1991, hodi  bolu  atensaun  ba  situasaun ne’ebé mak  País  ne’e  moris,  no  tau  Timor-Leste  iha kedan ajenda dahuluk internasional nian,  ne’ebé  sai  nu’udar  kontributu  importante  ba  libertasaun  Povu  Timoroan sira nian.