Inaugurasaun ba konstrusaun edifísiu foun Ministériu Finansa nian
Iha loron 14 fulan Maiu tinan 2012 reprezenta marku importante ida ba Ministériu Finansa tanba hetan inaugurasaun ba konstrusaun edifísiu foun andár sanulu iha Aitarak-Laran, Dili. Edifísiu foun Ministériu Finansa nian sei lokaliza iha dalan sorin Palásiu Prezidente nian, iha estrada Comoro nian.
Eventu ne’e hetan partisipasaun hosi membru oioin Estadu nian, parseiru dezenvolvimentu sira, reprezentante Igreja sira, funsionáriu sira Ministériu Finansa no empreza konstrutora nian, PP Persero.
Serimónia ne’e hahú ho rituál tradisionál ne’ebé dirije hosi lia-na’in no bensaun kristaun, ne’ebé bain-bain uza ona iha Timor-Leste ba serimónia boot sira, atuhodi proteje edifísiu ne’e, tuir tradisaun sosiedade Timoroan nian.
Iha nia diskursu, Ministra Finansa, Emília Pires halo sumáriu ida kona-ba realizasaun sira hosi ninia Ministériu dezde tomada pose Governu Aliansa Maoria Parlamentár (AMP) iha loron 7 fulan Agostu tinan 2007 liubá. Edifísiu foun Ministériu Finansa nian mós tama iha lista realizasaun sira, ne’ebé maka foin realiza iha finál mandatu ne’e, konsidera nu’udar legadu AMP nian ba governu foun. Ministra ne’e esplika tan katak prosesu administrativu maka lori konsepsaun no kontratasaun empreza konstrusaun edifísiu nian. “Hafoin prosesu konkursu públiku internasionál naruk no kompetitivu ida, iha tinan 2011 nia rohan, Ministériu hetan duni empreza Indonézia ida ne’ebé bele prienxe ita-nia espetativa sira iha nivel presu nomós rekizitu sira,” nia afirma.
Emília Pires subliña katak edifísiu andár sanulu ne’e nu’udar edifísiu dahuluk aas liu iha País no hein katak sei sai símbolu prestíjiu ba Timor-Leste, pelumenus iha tinan hirak oin mai. Edifísiu foun Ministériu Finansa nian ne’e sei kompostu hosi eskritóriu modernu no efisiente sira fatin multifunsionál oioin, kafetaria ida, kave (sala iha rai okos) ida atu rai ekipamentu suporte nian ba informátika no teknolójika jestaun elektrónika finansa públika nian nomós jardin ida iha terrasu. Área totál edifísiu nian maka 14,060 metru kuadradu. Edifísiu ne’e sei sai Edifísiu Matak Kualidade Aas. Konstrusaun sei halo hotu iha fulan 18 nia laran.
Ministra hatutan katak edifísiu ne’e sei tau ekipamentu ho sistema modernu no sala konfortável ba funsionáriu sira, atu nune’e, serbisu mós efikáz liután.
“Ita avansa loloos ona ba konstrusaun edifísiu foun Ministériu Finansas nian, ita keta haluha slogan ne’ebé ita adopta dezde 2010 – ‘Adeus Konflitu Benvindu Dezenvolvimentu!’ Tan de’it halakon konflitu no haburas pás iha País mak ita bele dezenvolve serbisu, ezemplu maka konstrusaun edifísiu foun Ministériu Finansa ne’e. Ita-nia dezeju hamutuk ho Ministériu Finansa katak situasaun mantein nafatin hanesan ne’e tinan ba tinan atu nune’e ita bele apoia dezenvolvimentu iha tempu naruk nia laran ne’ebé ita hotu-hotu hakarak ba ita-nia Povu no ita-nia País doben,” Ministra hakotu.
