Governu Timor-Leste

Ministériu Ekonomia no Dezenvolvimentu (MED), iha Kinta-feira, loron 19 fulan Abril  tinan 2012, halo alokasaun ba kareta Banku Móvel, unidade neen (6),  iha edifísiu Banku Nasionál Komérsiu Timor-Leste (BNKTL).

Kareta Banku Móvel ne’e iha fulan Maiu sei aloka hosi BNKTL ba Sukursál BNKTL iha Distritu neen mak hanesan, Baucau, Covalima, Díli, Aileu, Viqueque no Lautem hodi hala’o servisu sistema Banku Móvel iha Distritu, Sub-Distritu to’o Suku sira.

Ministru João Gonçalves esplika, “osan hosi orsamentu jerál estadu tinan 2011 ne’ebe utiliza sosa kareta unidade neen  ne’e, ninia totál  dólar amérika, rihun atus rua limanulu-resin sia. No tuir planu, iha tinan ne’e, Governu liu hosi MED sei hakarak sosa tan kareta unidade ualu (8), atu nune’e bele kompleta servisu atendimentu ba kliente BNKTL sira iha Distritu 13.

“Sistema Banku Móvel ne’e, sei fo vantajen bo’ot, tanba sei fasilita mós Ministériu  Solidariedade Sosiál ne’ebé mak sempre hetan difikuldade bainhira halo pagamentu. Ne’e duni, ho prosesu servisu atendimentu liuhusi Banku Móvel ne’e, bele ajuda halo pagamentu ne’ebé efetivu liu ba funsionáriu públiku no  idozu sira. Aleinde ne’e, populasaun sira mós bele loke konta bankária hanesan rai osan (depózitu) públiku no empresta osan, liu-liu ba populasaun iha área rurál  ne’ebé la-hetan asesu ba transporte atu mai to’o vila”, esplika Ministru João Gonçalves.