Governu Timor-Leste

Ministru Negósiu Estranjeiru, Zacarias Albano da Costa, iha tersa-feira, loron 3 fulan Abril, iha salaun Ministériu Negósiu Estranjeiru nian, simu karta kredensiál hosi Kónsul Onoráriu Repúblika Mosambike, ba Timor-Leste.

Ministru ne’e hatutan tan katak “Bainhira Nasaun hotu-hotu labele loke sira nia reprezentasaun diplomátika mak, sira loke reprezentasaun Konsulár. Servisu ida ne’e hodi haree ba interese país sira ne’e iha ita-nia rain no fó protesaun ba sira nia sidadaun, aleinde ne’e mós hanesan interlokutór sira ba relasaun entre Nasaun rua ne’e nian. Hanesan Timor-oan sente orgullu tanba Repúblika Mosambike bele eskolla timor-oan ida hanesan señor Oscar Lima ne’ebé ho nia esperiénsia no koñesimentu iha rede kontaktu sira hodi reprezenta Nasaun Mozambike iha Timor-Leste.

Ministru Zacarias Albano da Costa esplika mós katak, Nasaun Repúblika Mosambike la’ós nasaun foun ba Timor-Leste maibé nu’udar nasaun ida ne’ebé iha relasaun istórika efetiva no kulturál  ho Timor-Leste, nune’e mós ita Timor-Leste sei deve tebe-tebes tulun Mosambike nian ba lider Timor-Leste nian barak,  ne’ebé sira fó apoiu solidaridade tomak ba luta diplomátiku iha li’ur to’o Independénsia. Iha serimónia simu karta kredensiál Kónsul onoráriu Mosambike ne’e hateten katak, importante  ba jerasaun foun  atu hatene katak, Nasaun ida ne’e sempre apoia Timor-Leste iha nia prosesu negosiasaun diplomátika ba independénsia Timor-Leste nian.

Iha fatin hanesan, Kónsul onoráriu Repúblika Mosambike ba Timor-Leste, Oscar Lima hateten katak "ho konfiansa ne’ebé Estadu Mosambike, liuhosi Prezidente Repúblika, Armando Emílio Guebuza ho Ministru Negósiu Estranjeiru Oldemirio Balio, fó ba ha’u  hahú kedas iha loron 10 fulan Otubru, tinan 2011, ida ne’e hanesan mós  orgullu  boot ida ba ha’u, nu’udar Timoroan ida,  tanba ne’e ha’u tenke halo esforsu tomak  ba fi’ar ne’ebé fó mai ha’u atu bele kria  relasaun bilaterál sira, ne’ebé di’ak entre Timor-Leste no Mosambike atu fó benefisiu ba rai  rua ne’e".