Governu Timor-Leste

Polísia Nasionál Timor-Leste (PNTL) iha tersa-feira, loron 27 fulan Marsu tinan 2012, iha Kuartél Jerál PNTL, Díli, selebra ninian aniversáriu ba dasanuluk resin-rua,  ho tema selebrasaun nian, “Ho Profisionalizmu Ita Garante Pás no Estabilidade”

Komandante Jerál PNTL, Komisáriu, Longuinhos Monteiro, iha nia diskursu, “kongratula  Polisia Nasionál Timor-Leste (PNTL),  Ohin ita hamutuk iha ne’e, hodi dala ida tan selebra  aniversáriu PNTL ba dasanuluk resin-rua, instituisaun Estadu nian ne’ebé sei joven maibé hatudu ona imi nia dixiplina, maturidade no kompromisu hodi servi ita nia povu no ita nia Estadu liuhosi ita nia ezame dahuluk iha prosesu eleisaun jerál 2012 no hein katak ho realidade ida ne’e  bele justifika ona ba sé de’it mak durante ne’e kestiona profisionalizmu no kompromisu Polísia Nasionál Timor-Leste nian”.

Longuinhos mós hatutan maske izame dahuluk ita liu ona maibé ezame foun oi-oin sei iha ita nia oin, ezame ne’e la’ós de’it Polisia ka Forsa Armada Estadu nian ka forsa amiga seluk-seluk mak atu determina ninia susesu, maibé autodeterminasaun ida ne’e tenke mai nafatin hosi maturidade polítika no demokrátika hosi polítiku sira no ita nia povu tomak hanesan ezemplu ne’ebé hatudu ona iha primeira ronda eleisaun prezidensiál nian.

Iha fatin hanesan Prezidente Repúblika José Ramos-Horta, iha ninia diskursu hateten, “Ha’u fó parabéns ba Polísia Nasionál Timor-Leste  nu’udar Xefi  Estadu ba Komandante Jerál ho ninia kolega sira iha komando PNTL no mós ba UNPOL ne’ebé hamutuk ho PNTL iha tinan lima nia laran ne’e neneik-neneik ita harii instituisaun ida foun mai hosi krizi 2006 ne’ebé halo ita nia instituisaun PNTL nakfera  no mós lakon povu nia konfiansa, parabéns mós ba dezenvolvimentu  rekursu umanu iha PNTL liu hosi rekrutamentu foun, tanba espiritu  foun  ne’ebé  mai moris iha imi nia laran, mak iha tinan haat nia laran ne’e ita haree povu fiar fila fali PNTL, husu rasik PNTL atu marka prezensa barak liu iha teritóriu tomak”.