Traballadór timor-oan ba servisu iha Austrália
Sekretaria Estadu Formasaun Profisionál no Empregu (SEFOPE), iha loron 8 fulan Marsu, haruka grupu traballadór timor-oan sira ba-dahuluk hamutuk nain 6 kompostu husi mane 4 no feto 2 bá servisu iha Austrália iha área ospitalidade no turizmu.
“Ha’u husu ba traballadór sira tenke mantein dixiplina, hatudu atitude ida di’ak, hodi bele sai indikadór ba konfiansa nian, atu nune’e emprezáriu sira bele loke tan odamatan ba kolega sira seluk ne’ebé atu tuir. Tanba imi bá hodi Timor-Leste nia naran iha Austrália, no benefísiu ne’ebé mak sei hetan mak, esperénsia ba tékniku profisionál, lian inglés ho di’ak liután, kapitál no mudansa kultura dixiplina, hateten Sekretáriu Estadu, Bendito Freitas.
Sekretáriu Estadu informa tan katak, negosiasaun ba servisu ida ne’e mós halo dezde inísiu Governasaun nian to’o agora foin mak alkansa. Tanba ne’e iha fatin hanesan, nia hato’o agredesimentu ba Governu Austrália liuhosi Embaixadór Austrália ba Timor-Leste.
Embaixadór Austrália ba Timor-Leste, Francine, hateten katak, haksolok tebes timor-oan hakarak atu troka sira nia moris liuhosi programa pilotu ida ne’e, hein katak sira sei fila mai Timor lori kapitál iha sira nia bolsu hodi bele halo buat ruma iha Timor-Leste.
