Governu Timor-Leste

Governu liuhosi Sekretáriu Estadu Konsellu Ministru (SEKM) Ágio Pereira, iha loron 13 fulan Marsu 2012, asina kontratu Konsesaun ho Prezidente Konsellu Administrasaun Rádiu no Televizaun Timor-Leste-Emprenza Públiku (RTTL, E.P.) Expedito dias Ximenes, ho objetivu atu hametin obrigasaun RTTL, E.P. kona-ba informasaun no programasaun durante tinan 10 nia laran oin mai.

Sekretáriu Estadu Konsellu Ministru, Ágio Pereira, hateten, “Asina kontratu ne’e hanesan instrumentu jurídiku ikus nian, ne’ebé Governu hato’o ba RTTL, E.P.. Governu fó mós orientasaun ba publisidade nian, hodi bele halo ita boot sira nia knaar atu halibur fundu própriu bele maka’as  liután. Konsesaun ne’e hanesan, akordu ida entre órgaun sosiál sira RTTL, E.P. nian, ne’e duni ita boot sira nia otonomia respeitadu iha tinan 10 nia laran. Kontratu ne’e mós hanesan parseria ida, ne’ebé Governu hodi Estadu nian naran entrega ba ita boot sira órgaun ne’ebé Estadu ninian, RTTL, E.P. hodi halo jestaun didi’ak atu estadu ne’e nabilan”.

Sekretáriu Estadu Konsellu Ministru hatutan “serimónia asina kontratu konsesaun ne’e simples, maibé relevánsia ba dezenvolvimentu nasionál Estadu nian boot tebes”.

Iha fatin hanesan Prezidente Konsellu Administrasaun RTTL, E.P., Expedito dias Ximenes, hateten “Valór importante ba RTTL hanesan imprensa públiku, bazeia ba dekretu lei 42/2008 ne’ebé transforma RTTL hosi Public Broadcasting Servise ba impreza publiku, maske kondisaun RTTL iha, seidauk bele responde ba ejijénsia hosi produtu legal dekretu lei ida ne’e, maibé atensaun maka’as hosi Governu ida ne’e, liuliu órgaun tutela ba iha RTTL, neineik  ba neineik RTTL sei responde espetativa hosi ouvinte no telespetadór sira”.