Japaun sei kontinua fó apoio ba Timor-Leste
Ministru Negósiu Estranjeiru, Zacarias Albano da Costa, hala’o sorumutu ho nia omólogo japonés, Koichiro Gemba iha loron 8 fulan Marsu. Hafoin sorumutu ne’e, nia haktuir, asuntu ne’ebé nia ko’alia iha sorumutu ne’e kona-ba Japaun nia kompromisu atu tulun nafatin dezenvolvimentu Timor-Leste nian: “sira hakarak reforsa liután ita-nia relasaun amizade”.
Ministru Negósiu Estranjeiru Japaun, Koichiro Gemba realsa katak, Japaun iha intensaun atu kontinua fó suporte ba Timor-Leste iha área esensiál sira, liuliu iha área infra-estrutura, edukasaun, treinamentu ba kadete F-FDTL sira no área kapasitasaun umana sira seluk.
Timor-Leste sei asina akordu ho Japaun hodi husu empréstimu osan (yen loan) hamutuk dólar amerikanu millaun 70. Emprestimu ne’e ninia objetivu atu halo estrada Dili-Baucau. Primeiru-Ministru, Kay Rala Xanana Gusmão sei hala’o vizita ofisiál ida ba Japaun atu asina akordu ne’e iha fulan Marsu nia laran.
Zacarias Albano da Costa mós hala’o vizita kortezia ba Ministériu Defeza Japaun. Ministru Defeza Japaun, Naoki Tanaka afirma katak, Japaun iha intensaun atu fó suporte nafatin ba elementu F-FDTL sira iha área dezenvolvimentu rekursu umanu nomós sei simu nafatin membru foun ne’ebé atu hala’o formasaun iha Akademia Defeza Nasionál.
Zacarias Albano da Costa hatutan katak, Ministru Negósiu Estranjeiru no Ministru Defeza Japaun kompromete atu fó nafatin apoiu ba Timor-Leste atu adere ba ASEAN. Ministru na’in rua ne’e espresa sira-nia satisfasaun kona-ba estabilidade no seguransa iha Timor-Leste.
“Situasaun sira ne’e sei fó impaktu boot ba dezenvolvimentu ekonómiku no atrai investimentu husi rai-li’ur. Emprezáriu balu ne’ebé ohin ha’u hasoru, espresa sira-nia hakarak atu vizita Timor-Leste hodi haree kondisaun reál iha rai-laran no identifika área prioritáriu investimentu nian”, tenik Ministru Negósiu Estranjeiru.
Tuir ajenda ba loron tuirmai, Ministru Negósiu Estranjeiru Timor-Leste sei hala’o sorumutu ho embaixadór CPLP akreditadu ba Japaun, vizita kortezia ba Parlamentu Japaun no hala’o mós sorumutu ida ho jornalista sira hosi National Press Club.
