Governu Timor-Leste

Primeiru-Ministru, Kay Rala Xanana Gusmão, inaugura irigasaun Bebui iha subdistritu Uatulari, Distritu Vikeke, iha loron 27 fulan Fevereiru.

Xanana Gusmão, iha nia diskursu hateten, inan-aman sira, foinsa’e sira, ita hotu hateke uitoan ba kotuk, hodi hanoin hikas fali katak bainhira ita sa’e foho matebian, hare iha tetuk ida ne’e ita la lori hotu, kuda hotu sai krekas, ita hotu sai kleuk, bainhira inimigu tama lulun ita iha foho Matebian ne’e, hare iha ne’e so’e hela de’it, no iha 2001 ita-nia estrada ninin faan foos hosi liur, kleur duni, tinan 10 liu tiha foin mak ita iha kbiit atu fó fali bee ba natar.

Ministru Agrikultura no Peska, Mariano Assanami Sabino esplika katak, “Irrigasaun ne’e sei fornese bee ba hektare rihun ualunulu, maibé ita foin mak halo de’it hektare rihun neennulu, ne’ebé husu ba inan aman sira iha Vikeke liliu iha Uatulari atu badinas servisu, utiliza didi’ak irrigasaun ida ne’e, atu ita fornese aihan ba iha timor laran tomak,” apela Ministru

José de Sousa reprezentante hosi administrasaun distritu Vikeke nian, hateten, “hodi komunidade Vikeke, liuliu komunidade subdistritu Uatulari nia naran agradese ba apoiu ne’ebé Primeiru-Ministru fó hodi harii irrigasaun ida ne’e, ne’ebé, ho irrigasaun ida ne’e bele ajuda ami agrikultór sira iha subdistritu Uatulari ne’e, atu hadi’a, ami-nia vida ba oin”.

Akompaña Primeiru-Ministru iha serimónia Inaugurasaun ne’e mak, Ministru Agrikultura no Peska, Mariano Asanami Sabino; Ministra Solidariedade Sosiál, Domingas Alves; Sekretáriu Estadu Agrikultura no Abrorikultura, Marcos da Cruz; Sekretáriu Estadu Konsellu Ministrus, Agio Pereira; Sekretáriu Estadu Pekuaria, Valentino Varela; Sekratáriu Estadu Reforma Administrativa, Florindo Pereira; Sekretáriu Estadu Eletrisidade, Agua no Urbanizasaun, Januario Pereira; Embaixadór Portugal ba Timor-Leste, autoridade distrital no subdistritál no populasaun subdistritu Uatulari.