Kandidatu sira asina "Paktu Eleisaun Pasífika"
![Pacto_Eleicoes_PORTAL](https://timor-leste.gov.tl/wp-content/uploads/2012/03/Pacto_Eleicoes_PORTAL.jpg)
Komisaun Nasionál ba Eleisaun (KNE), organiza eventu boot iha Díli, Timor-Leste hodi halibur Kandidatu Presidente Repúblika ba periodu 2012 - 2017 no Partidu Polítiku sira hodi asina Paktu Eleisaun Pasífiku, iha loron Tersa, 28 fulan Fevereiru 2012, iha Sentru Konvensaun Díli.
Objetivu hosi asina Paktu Eleisaun Pasifiku ne’e hodi hametin liután estabilidade Nasionál iha eleisaun Prezidensiál no Parlamentar ne’ebé sei hala’o iha loron 17 fulan Marsu no eleisaun parlamentár iha fulan Juñu.
Eventu ne’e hahú uluk ho serimónia rituál ne’ebé diriji hosi reprezentante lia na’in hosi Distritu sanulu resin tolu, ho tradisaun look bua-malus ba kandidatu no partidu polítiku sira atu mama, nu’udar simbólu ba pás nian.
Hafoin asina tiha paktu eleisaun pasífika tuir kedas ho debate públiku entre kandadidatu 12 maibé kandidatu Francisco Xavier do Amaral de’it mak la marka prezensa tanba moras. Debate públiku ne’e dirije hosi Komisáriu CNE, Pe. Martinho Gusmão, ho tópiku sira hanesan, Motivasaun atu kandidata-an ba Prezindente Repúblika, Unidade Nasionál no pluralismu, Igualdade Jéneru no kontribuisaun ba Estadu ida ne’e, bainhira la eleitu nu’udar Prezidente Repúblika.
Kandidatu hotu-hotu aprezenta sira nia vizaun no misaun, bainhira eleitu iha eleisaun ne’ebé mak sei hala’o iha loron 17 fulan Marsu 2012, no hotu-hotu garante atu defende Konstituisaun, hametin unidade nasionál hakarak kontribui ba pás, estabilidade no dezenvolvimentu Nasaun ida ne’e nian.
Prezidente Komisaun Nasionál ba Eleisaun (KNE), Faustino Cardozo hatete katak, “eventu ida ne’e istóriku tebe-tebes maske nia konteúdu no materizasaun sei depende ba ita ida-idak nia konsiénsia no responsabilidade, hodi realiza asina paktu eleisaun pasífiku, iha tinan 2012 nian ho objetivu atu hametin liután sidadaun elitór sira nia matenek no sira nia afirmasaun nu’udar na’in ba eleisaun ne’e rasik, hodi halo kompromisiu no hato’o mensajen nu’udar eleisaun pasifika atu nune’e bele asegura estabilidade no unidade nasionál”.