Konferénsia “Hafoin tinan 10 Kontribuisaun hosi programa Sosiál Sira hodi Harii Estadu Sosiál iha Timor-Leste”
Ministériu Solidariedade Sosiál (MSS) organiza konferénsia ho tema, ”Hafoin tinan 10 Kontribuisaun hosi programa Sosiál Sira hodi Harii Estadu Sosiál iha Timor-Leste”. Konferénsia ne’e hala’o iha loron 16 to’o 17 fulan Fevereiru iha Sentru Konvensaun Dili.
Ho partisipasaun membru Governu oioin, diretór, xefe departamentu no parseiru dezenvolvimentu sira, konferénsia ne’e halo debate ba tema boot haat: 1 – Protesaun Sosiál Sidadania nian: a) Servisu Sosiál sira (atu garante asesu), b) Transferénsia sira (atu garante rendimentu), c) Instituisaun no Apoiu Espesiál sira (atu insentiva inisiativa sira); 2 – Intervensaun Sosiál iha Situasaun sira Emerjénsia nian; 3 – Rejime Espesiál Veteranu sira nian no 4 – Seguransa Sosiál.
Ministra Solidariedade Sosiál, Maria Domingas Alves, iha ninia diskursu hateten, “Fatór istóriku iha Timór-Leste hatudu ezisténsia forte ba oportunidade, dezekilíbriu asesu ba riku soin entre sidade ho rurál sira. Situasaun ida ne’e hamosu rendimentu ne’ebé menus no kiik hodi asegura nesesidade báziku nian hodi lakon podér ba partisipasaun”.
Maria Domingas Alves hatutan katak liu hosi konferénsia ne’e hanesan momentu ida oportunu no istóriku, hodi hala’o vontade polítika iha promosaun ba protesaun sosiál no valorizasaun ba sidadania hodi traduz programa ne’ebé hahú hosi primeiru Governu Konstitusionál to’o iha IV Governu Konstitusionál , no mós fó onra ba prinsipius justu no koerente ba Estadu seguransa no asisténsia sosiál.
Bruto da Costa, peritu iha área sosiál, nomós eis- Prezidente Konsellu Ekonómiku no Sosiál Portugal nian hato’o katak, objetivu prinsipál sira hosi polítika sosiál nian mak bem estar ka moris di’ak ba ema hotu. Bruto fó klasifikasaun katak, bem estar ne’e atu realiza tenke haree pontu importante tolu, mak prioridade bázika ba nesesidade umana, prevensaun ka solusaun ba problema sosiál sira no satisfasaun ba direitu sosiál sira.
Konferénsia ne’e hetan partisipasaun hosi Primeiru-Ministru Kay Rala Xanan Gusmão,Ministra Solidariedade Sosiál Maria Domingas Fernandes Alves,Sekratária Estadu Asuntus Antigus Kombatentes Mário Nicolau dos Reis,Sekretária Estadu Seguransa-Sosiál Vitór da Costa,Sekretária Estadu Asisténsia Sosiál no Dezastre Naturais Jacinto Rigoberto de Deus,Deputy Espesiál UNMIT Finn Rieske Nielsen, reprezentante Ajénsia Internasionál, ONG nasionál, relijiozas, Xefe Sentru Rejionál distritu 6, Animadores Sosiál hosi sub-distritu 65 nomós Diretór no Xefe departamentu sira.
