Governu Timor-Leste

Primeiru-Ministru filafali mai Timor-Leste hafoin halo vizita loron hitu ba Austrália. Durante vizita ofisiál ne’e, Kay Rala Xanana Gusmão halo debate kona-ba relasaun bilaterál no reforsa kooperasaun ho Primeira-Ministra Austrália, Primeiru-Ministru no Governadór Estadu Nova Gales Sul nian no Primeiru-Ministru interinu no Governadór Estadu Victoria nian. Primeiru-Ministru Timor-Leste promove investimentu estranjeiru no dezenvolvimentu setór privadu Timor-Leste nian iha sorumutu ne’ebé hala’o ho Kámara Komérsiu no Indústria Estadu Victoria nian no iha resepsaun ida ho Konsellu Emprezariál Austrália no Timor-Leste nian.

Aleinde mantein sorumutu ida ho DLA Piper, empreza Boot advogadu sira nian iha mundu, hodi diskute programa direitu komersiál ne’ebé empreza ne’e dezenvolve daudaun ho gratuitu ba Timor-Leste, Primeiru-Ministru hasoru-malu ho Fundasaun Balibo House Trust ne’ebé aprezenta ninia projetu mai hosi eransa arkitektónika ba dezenvolvimentu Forte Balibo nian.

Ho objetivu atu kria oportunidade ba konxiénsia boot ida Timor-Leste nian, Primeiru-Ministru lansa livru ida kona-ba diskursu sira: “Xanana Gusmão, Estratéjia ba Aban-bainrua”, iha Sydney no Melbourne.

Nomós iha Sydney, Primeiru-Ministru partisipa iha komemorasaun aniversáriu ba dala-70 Batalla Timor nian ne’ebé inklui mós abertura espozisaun ida iha Memoriál ANZAC.

Durante vizita ba Austrália ne’e, Primeiru-Ministru hasoru-malu mós ho Xefe Ezekutivu empreza Woodside nian no nia hetan informasaun kona-ba progresu hosi Planu Diretór Bee no Saneamentu Dili nian ne’ebé hetan apoiu hosi Melbourne Water and Yarra Valley Water.

Haree fotografia ofisiál vizita ne’e, favor ida, hanehan iha ne’e.

Haree komunikadu ba imprensa, favor ida, hanehan iha ne’e.