Governu Timor-Leste

Sekretaria Estadu Konsellu Ministru (SEKM) organiza workshop ba editór no jornalista sira iha Timor-Leste, ho tema “Tinan 2012, Tinan atu Profisionaliza Servisu Komunikasaun Sosiál sira Iha Timor-Leste” durante loron tolu, hahú hosi loron 20 to’o loron 22 fulan fevereiru, iha Otél Excelsior Resort, Dili. Objetivu hosi Workshop ne’e atu fó kapasitasaun ba jornalista no editór sira nu’udár meiu importante iha prosesu konstrusaun Nasaun Timor-Leste nian.

“Ha’u agradese ba prezensa jornalista no profisionál sira seluk nian iha eventu ida ne’e no ha’u fiar katak Workshop ida ne’e sei reprezenta oportunidade ida tan ba ita hotu atu halo reflesaun kona-ba papél media nian iha sosiedade. Nu’udar ita hatene, hosi parte Governu nian, Polítika Nasionál ba Komunikasaun Sosial, ne’ebé hetan aprovasaun iha tinan 2010, defende nu’udar pilar atuasaun nian ne’ebé temi kona-ba setór ida ne’e, diseminasaun informasaun hosi/ba distritu sira, regulasaun relasaun entre jornalista sira no entre jornalista sira ho públiku no formasaun ba profisionál sira ne’ebé rigorozu no responsavel”, hateten Sekretáriu Estadu Konsellu Ministrus, Ágio Pereira, liu hosi mensajen ne’ebé lee hosi Prezidente Komisaun Organizadora, iha sesaun abertura nian.

Iha mensajen ne’e, Ágio Pereira, hatutan tan, “Objetivu hosi buat sira ne’e hotu mak atu ita iha komunikasaun sosiál ida ne’ebé independente no plural, iha kbi’it atu dinamiza konstrusaun ita nia Estadu Demokrátiku nian no bele kontribui ba ezisténsia komunidade nasionál ida ne’ebé hetan informasaun ba bebeik, kona-ba sira nia valór kultural sira”.

Prezidente Parlamentu Nasionál, Fernando Lasama de Araújo, iha nia intervensaun iha sesaun abertura hateten katak, “kapasitasaun ba jornalista no editór sira nu’udar meiu importante ida iha sosiedade ne’ebé de’it, mós importante ba Nasaun foun iha prosesu konstrusaun Estadu-Nasaun Timor-Leste. Tanba ne’e mak IV Governu Konstitusionál iha ninia Programa Governu nian, ne’ebe hetan aprovasaun iha Parlamentu Nasional (PN) iha fulan Setembru tinan 2007 ne’ebe fó mos prioridade ba formasaun ba rekursus umanus ne´ebe integradu.

Hafoin sesaun abertura hahú kedas ho sesaun dahuluk nian, ne’ebé aprezenta hosi Sekretáriu Estadu Políitiku Enerjetika, Avelino Coelho, ho topiku, Perspetiva Hosi Komunikasaun Sosiál Hodi Konstroi Prosesu Dezenvolvimentu Nasionál no Demokrasia”, tuir fali diretór jornál Indonézia nian “Tempo” ho eis-membru Consellu Impresa Indonézia nian, Bambang Harymurti ho tópiku, Ezijensia Profisionalismu hosi Jornalista sira no Papel Média nu’udar kontrolu Sosiál.

Iha sesaun lorkraik, fahe ba klase rua, klase editór no klase Jornalista, ne’ebé lidera hosi, Bambang Harymurti no Atmakusuma Astraatmadja, eis-membru Consellu Impresa Indonézia nian.

Iha workshop ne’e marka prezensa mós Diretór-Jerál SECM, Victor Maia, reprezentante Asuntu Kooperasaun, UNTL, Lizinha Correia, Diretór Media sira iha Timor-Leste, reprezentante hosi Departamentu Komunikasaun Sosiál, UNTL, Asosiasaun Jornalista sira, ONG no responsavel media iha Governu nian.