Komisaun Doasaun Espóliu Misaun UNMIT nian halo vizita ba Obrigado Barracks
Iha loron 7 fulan Fevereiru, komitiva ida lidera hosi Visi-Ministru Finansa no Prezidente Komisaun Doasaun Espóliu Misaun UNMIT nian ba Timor-Leste, Rui Manuel Hanjam, halo vizita ba Obrigado Barracks, kompleksu Nasoens Unidas nian, atu haree sasán sira ne’ebé UNMIT sei fó ba Governu Timor-Leste, no halo diskusaun kona-ba protokolu no mekanizmu hirak ne’ebé iha relasaun ho prosesu doasaun nian.
Komisaun ne’e estabelese iha Sorumutu Konsellu Ministru nian, no ho objetivu prinsipál atu halo koordenasaun no inspesaun ba etapa hotu-hotu iha prosesu doasaun nian, Komisaun Doasaun, ne’ebé akompaña mós hosi elementu balu Ministériu Saúde nian iha vizita ida ne’e, define no diskute ona kona-ba etapa doasaun hirak ne’ebé tuir mai, inventáriu sasán hirak ne’e nian no prosedimentu no formalidade hirak ne’ebé mak presiza atu kumpre.
Pontu prinsipal ida ne’ebé foti hosi Prezidenti Komisaun iha sorumutu ne’e mak rekursu umanu, liu-liu, nesesidade urjente atu treina tékniku sira Governu nian, atu nune’e sira bele hetan kompeténsia sira ne’ebé mak presiza ba funsionamentu servisu UNMIT nian (hanesan purezemplu, klínika médika ka armazén sirsa) no kapasidade Governu nian atu hetan rekursu umanu nasional sira ne’ebé agora daudaun sei hala’o hela kna’ar sira nian iha UNMIT.
Prezidente Komisaun hateten mós katak, Governu la’ós hakarak simu de’it sasán sira hosi UNMIT, maibé mós nia sistema funsionamentu. Ida ne’e signifika katak, Governu hakarak adopta organizasaun, metodolojia, teknolojia, koñesimentu no profisionalizmu UNMIT nian, ne’ebé implika koordenasaun ida entre Governu Timor-Leste no UNMIT, atu fortalese no treina tékniku sira Governu nian.
Hafoin liu tiha sorumutu ne’e, komitiva vizita mós instalasaun físika no ekipamentu UNMIT nian, ne’ebé halo parte iha sasán hirak atu fó ne’e, liu-liu, klínika médika, Servisu Informasaun Jeográfika (SIJ), ofisina sira, armazén materiál eskritóriu nian no seksaun teknolojia ba komunikasaun no informasaun.
Kampu aviasaun mós sei sai fatin ba vizita ne’e tanba instalasaun hirak ne’e iha rekursu materiál barak tebe-tebes ne’ebé sei útil tebes ba entidade no instituisaun sira Governu nian. Prioridade Komisaun Doasaun nian mak asegura distribuisaun ida ne’ebé loos no rigorozu ba sasán sira, hodi garante katak halo distribuisaun ne’e tuir duni nesesidade rekerente sira nian.
Kompete mós ba Komisaun Doasaun atu hateten loloos katak Governu nia instituisaun sira iha kapasidade, iha rekursu finanseiru no umanu atu bele uza ho didiak sasán sira ne’ebé simu ne’e, no garante mós manutensaun ida apropriadu ba sasán sira ne’e.
