Vise-Ministru Finansa hala’o sorumutu ho Embaixadór Brazíl nian
Iha loron 3 fulan Fevereiru, Rui Manuel Hanjam, Vise-Ministru Finansa nian simu delegasaun ida hosi Brazíl lidera hosi Embaixadór Brazileiru iha Timor-Leste, Edson Monteiro. Sorumutu ida-ne’e atu buka hametin amizade no kooperasaun ba país rua ne’e no identifika área vulnerável hirak ne’ebé Governu Brazileiru bele buka investe iha nível edukasaun nian.
Iha sorumutu ne’ebé partisipa hosi reprezentante hosi sistema edukasaun Brazíl nian, inklui mós Diretór Jerál Eskola Administrasaun Finansa Públika nian, Vise-Ministru Finansa subliña importánsia ne’ebé iha ona kooperasaun Brazíl ba difikuldade linguístika no ba reforsu kompeténsia funsionáriu sira nian. Ko’alia mós kona-ba, tenke fó nafatin kontinuidade ba servisu ne’e no investe ba iha setór alfándega, kontabilidade, impostu sira nian no ba iha Diresaun Nasionál Reseita Petrolífera, liu-liu ba iha área jurídika nian.
Makroekonomia no estatístika sai nu’udar área sira seluk iha diskusaun nia laran. Rekoñese katak preparasaun ne’e importante ba iha Orsamentu Jerál Estadu no jestaun finansa públika nian, Vise-Ministru Finansa no Diretora-Jerál Servisu Kooperativu nian, Santina Cardoso, identifika ona dezafiu no frakeza balun ne’ebé Estadu Brazíl bele fó asisténsia liu hosi programa ida formasaun nian iha Timor-Leste no haruka funsionáriu timoroan sira bá Brazíl.
Ikus mai, Embaixadór Brazíl nian, Edson Monteiro, fó hanoin katak objetivu másimu kooperasaun no apoiu Brazíl nian iha Timor-Leste, mak buka sustentabilidade rekursu umanu nian, hodi fó funsionáriu sira kompeténsia linguístika no téknika ne’ebé presiza ba iha dezempeñu efisiente funsaun sira nian.
