Inaugura Postu Integradu no Merkadu Tradisionál iha fronteira Batugade
Prezidente Repúblika José Ramos-Horta, Primeiru-Ministru, Kay Rala Xanana Gusmão, Ministru Turizmu Komérsiu no Indústria, Gil Alves no Vise Ministru Finansa, Rui Manuel Hanjam, iha loron 4 Fevereiru, inaugura postu integradu no merkadu tradisionál iha fronteira Batugade, subdistritu Balibo, Distritu Bobonaro.
Vise Ministru Finansa, Rui Manuel Hanjam iha ninia diskursu hateten, “iha serimónia inaugurasaun ba fronteira integradu no merkadu tradisionál Batugade, ne’ebé marka progresu no melloria ho valór ne’ebé aas tebetebes liu-liu kona-ba efisiénsia kontrolu iha fronteira ne’ebé bele hakoak liña ministriál no instituisaun sira hotu atu asegura servisu atendimentu ida ne’ebé di’ak liu iha fronteira”.
“Postu integradu sira ne’e sei permiti turista no komersiante sira sei sai tama iha prosesu formál, tama no sai iha país, iha ambiente ida ne’ebé amigável no modernu no mós transmiti imajen boasvinda ba ema hotu ne’ebé atravesa fronteira Timor-Leste, nune’e sei permiti mós funsionáriu sira ne’ebé servisu iha fronteira atu ezerse sira-nia funsaun iha ambiente ida ne’ebé dignu no adekuadu”, dehan Vise Ministru.
Atu remata, Rui Manuel Hanjam hateten katak “Ami mós tau ekipamentu kona-ba teknolójia informátika, vijilánsia no seguransa ne’ebé mak modernu liu-liu komputadór, internet, sistema vizilánsia ho buat sira seluk tan, hafoin o mós mákina RAY-X atu garante katak funsionamentu di’ak ba postu integradu no mós fiskalizasaun ba kontrolu ida ne’ebé efisiente ba sasán no ema sira ne’ebé liuhosi fronteira”.
