MSS aprezenta Lei Rejime Tranzitóriu Sistema Seguransa Sosiál ba Traballadór sira Estadu nian
Iha segunda-feira, loron 30, fulan Janeiru, Ministériu Solidariedade Sosiál (MSS), aprezenta ba públiku, iha konferénsia imprensa ida ne’ebé hala’o iha salaun sorumutu ministériu ne’e nian, lei ne’ebé regulamenta Rejime Tranzitóriu kona-ba Sistema Seguransa Sosiál ba traballadór sira Estadu nian.
Ministra Solidariedade Sosiál, Maria Domingas Alves, anunsia ona kona-ba lei ne’e, ne’ebé aprova ona husi Parlamentu Nasionál, hanesan diploma legál ba dahuluk kona-ba sistema Seguransa Sosiál iha Timor-Leste. Diploma ida ne’e, reprezenta desizaun Governu nian atu kria sistema ida ne’ebé mak fó benefísiu ba traballadór sira Estadu nian, atu estabelese direitu sosiál ne’ebé mak sai hanesan baze ba rejime jerál no definitivu ba seguransa sosiál.
Maria Domingas Alves hatutan tan katak, tuir prevee iha lei, traballadór sira Estadu nian bele rekere tuir akordu ho kondisaun atribuisaun ida-idak nian, pensaun ba otas na’in sira, pensaun ba sira ne’ebé inválidu no pensaun sobrevivénsia.
Sekretáriu Estadu Seguransa Sosiál, Vítor da Costa, konsidera lei ne’e hanesan komprimisu ida ne’ebé iha kbiit Governu nian atu, liu husi Kódigu Traballu ne’ebé aprova ona, atu asegura seguransa sosiál ba funsionáriu hotu-hotu.
Prezidente Komisaun Públika, Libóriu Pereira, hatutan katak funsionáriu sira ho idade reforma, no rejista ona, hamutuk totál 1.200, karik inklui pensaun sobrevivénsia sira no inválidu sira, hamutuk totál funsionáriu sira 2.047.
Iha prezensa ba eventu ne’e, Ministra Solidariedade Sosiál, Secretáriu Estadu Seguransa Sosiál, Vise-Ministru Finansas no Prezidente Funsaun Públika.
