Governu Timor-Leste

Governu Timor-Leste, liuhosi Sekretaria Estadu Juventude no Desportu (SEJD), iha loron 14 fulan Jeneiru, iha edifisiu SEJD nian, asina akordu bilaterál ida ho nasaun Cuba iha área téknika desportu ninian.

Sekretáriu Estadu Juventude no Desportu, Miguel Manetelo, iha konferénsia imprensa informa katak, tékniku nain hitu ne’e sei fó apoiu iha área desportu nian hanesan iha modalidade atletizmu, voliból, boxing, metodolojia desportu komunitáriu no mós profesór ba edukasaun fízika no desportu iha universidade.

Miguel Manetelo apela mós ba treinadór no atleta sira hosi Federasaun liu-liu Voleiból, Boxing no Atletizmu atu uza tempu ne’e ho didi’ak hodi nune’e bele aprende buat barak molok treinadór Kubanu sira ne’e remata sira nia mandatu.

Tékniku nain hitu ne’e mak hanesan Alberto Ramos (atletizmu), Anahim Liorente Corina (boxing), Heberto Sarmento Bio (voliból), Dania Librada Garcia Fernandez (metodolojia desportu komunitáriu), Armando Pascual Lermo (metodolojia desportu eskolar no edukasaun fízika), Lazaro de Ia Paz Arencibia (profesór universitáriu metodolojia desportu) no José Ribeira Rodrigues (metodolojia altu rendimentu).