Ministériu Justisa kontinua halo publikasaun ba Mapa Kadastrál
Ministériu Justisa, kontinua halo publikasaun ba mapa kadastrál nian iha sub-distritu Maliana, Distritu Bobonaro iha Kuarta-feira, loron 4 fulan-Janeiru 2012. Antes ne’e halo ona programa ne’e iha Distritu Likisa, Manatutu no Ainaro.
“Lei ne’ebé oras ne’e sei iha meza Parlamentu Nasionál, atu halo aprovasaun sei ko’alia liu kona-ba asuntu tolu hanesan rezolve asuntu disputa, proteje komunidade nia rai no deklarasun ne’ebé nia halo kona-ba nain ba rai. Tanba ne’e ha’u husu ba komunidade sira atu labele fa’an rai arbiru, husu ba imi atu arrenda deit ho nune’e iha futuru bei-oan sira mós sei bele uza,”
Lúcia Lobato esplika tan katak, “kona-ba rai sira ne’ebé hetan disputa sei uza hela regra sira ne’ebé defini tiha ona iha períodu administrasaun Portugés nian. Maibé lei ne’ebé atu aprova iha Parlamentu Nasionál, difine ona katak, surat- tadak (sertifikadu) iha periodu portugés nian, hanesan alvará ho bulletin ofisiál no surat- tadak iha periodu okupasaun indonézia nian sei la sai nu’udar prova únika. Ema ne’ebé okupa hela rai ida no nia mak nain ba rai ne’e tuir termu sira ne’ebé define iha lei, maibé tenke iha dokumentu komprovativu sira”.
Publikasaun mapa ne’e hala’o de’it ba suku 5 iha subdistritu Maliana nia laran ne’ebé tama iha área halibur dadus kadastrál nian.
