Komponente Navál F-FDTL komemora aniversáriu ba dasanuluk
FALINTIL–Forsa Defeza Timor-Leste (F-FDTL) hosi Komponente Navál, kinta-feira, loron 12 Janeiru selebra loron anivesáriu ba dasanuluk iha baze komponente Navál Hera.
Majór Jenerál F-FDTL Lere Anan Timur, iha nia diskursu hatete “Forsa Armada, durante tinan sanulu resin rua nia laran, enfrenta problema oinoin hosi rekursu umanu, infraestrutura no problema sira seluk tan, liuliu iha problema jurídiku, maibé ita-nia governu buka tuir nafatin atu responde ba ejijénsia ne’ebé iha, to’o agora ita hala’o tuir de’it Lei internasionál, tanba ita seidauk iha Lei autoridade marítima tanba ne’e ita seidauk iha direitu atu persege ró ilegal sira ne’e.
Majór Lere, husu ba Forsa F-FDTL foun sira ne’ebé foin tama iha insituisaun ne’e, hahú hosi tinan 2009 to’o 2010 atu sai hanesan aifunan no aitahan atu bele morin no bele fó mahon ba ita-nia povu no nasaun, bainhira aifunan namlaek no aitahan monu ha' u hanoin katak laiha mahon ida ba ita-nia povu no nasaun. Tan ne’e ha'u husu ba imi tomak atu kompri tuir responsabilidade ne’ebé ita-nia nasaun no ita-nia povu entrega ba instituisaun ida ne’e nomós ba ita ida-idak.
Primeiru-Ministru, Kay Rala Xanana Gusmão, nu’udar mós Ministru Defeza no Seguransa hatuir “ita-nia ukun-an foin tinan sia ba tinan sanulu, ita sei halo esforsu nafatin atu kapasita instituisaun estadu nian no lahaluha instituisaun Defeza no Seguransa, tanba ne’e povu hanesan ai ida kuandu nia tahan monu, funan laiha, fuan laiha, mahon ba ita-nia povu mós laiha. Ida ne’e mak governu sei tau matan nafatin ba instituisaun rua ne’ebé sei garante soberania nasaun nian, sei garante mós konfiansa ba ita-nia povu katak ita bele la’o ho hakmatek ho domin ho dame.Bainhira ita halo reflesaun ba kotuk atu hanorin de’it ba ita katak buat ne’ebé ita halo ladún di’ak iha kotuk mai oin ita sei lahalo tan liuliu iha F-FDTL no PNTL.
Marka prezensa iha aniversariu komponente Navál F-FDTL ne’e, Primeiru-Ministru Kay Rala Xanana Gusmão, Sekretáriu Estadu Defeza, Julio Tomas Pinto, Prezidente Parlamentu Nasionál, Fernando Lasama de Araujo, Xefe Estadu Majór Jenerál F-FDTL Lere Anan Timur, Vise Xefe Estadu Majór Jenerál F-FDTL Brigadeiru Filomeno Paixão, Embaixador Koreia Iha Timor-Leste, Seo Kyoung-Suk, Embaixadora Estadus Unidus Amerika Yudith Vergine, no ofisiál sira, Sarjentu, Prasa no Soldadu F-FDTL sira hotu.
