Governu Timor-Leste

Ministériu Defeza no Seguransa iha sesta-feira, loron 5 fulan Janeiru 2012, iha Sentru Konvesaun Díli, halo sorumutu ida entre Falintil-Forsa Defeza Timor-Leste ho Polisia Nasionál Timor-Leste, ho objetivu atu ko’alia kona-ba kompromisu hosi instituisaun rua ne’e, hodi asegura seguransa ba eleisaun jerál prezidensiál no Parlamentár nomós halo preparasaun atu simu reponsabilidade knaar seguransa nian hosi misaun ONU ne’ebé sei remata iha tinan 2012.

Primeiru-Ministru, Kay-Rala Xanana Gusmão, nu’udar mós Ministru Defeza no Seguransa hatete “ ita nia konstituisaun la fó dalan ba PNTL no F-FDTL atu envolve an iha partidu politiku atu nune’e bele garante neutralidade iha povu nia le’et iha  Eleisaun Jerál 2012 mai ne’e

Sekretáriu Estadu Seguransa, Francisco Guterres, hateten “instituisaun PNTL no F-FDTL nia papél importante tebetebes atu garante  estabilidade iha ita nia Nasaun, tanba ne’e, bazeia ba lei seguransa nasionál ne’ebé iha, instituisaun rua ne’e iha kompromisu boot atu garante duni seguransa iha festa demokrasia ne’ebé sei hala’o iha ita nia nasaun iha fulan hirak tuir mai ne’e.”

Iha fatin hanesan Sekretáriu Estadu Defeza, Júlio Tomas Pinto, husu ba PNTL no F-FDTL atu hatudu ba públiku katak “ita hala’o duni ita nia papél tuir lei sira ne’ebé iha no tuir ita nia misaun ne’ebé fó sai ona iha ita nia konstituisaun,tanba ne’e instituisaun PNTL no F-FDTL ne’e instituisaun ne’ebé neutru, atu nune’e bele kria estabilidade ba nasaun ida ne’e no bele asegura seguransa  iha elisaun jerál 2012 mai ne’e ho di’ak liután.

Marka Prezensa iha sorumutu ne’e,Prezidente Repúblika, José Ramos Horta, Primeiru-Ministru, Kay-Rala Xanana Gusmão, Sekretáriu Estadu Seguransa, Francisco Guterres, Sekretáriu Estadu Defeza, Júlio Tomas Pinto, Majór Jenerál Lere Anan Timur, Komandante jerál PNTL, Komisáriu Longuinhos Monteiro, Ofisiál sira hosi F-FDTL no PNTL sira hotu.