Governu Timor-Leste

Falintil-Forsa Defeza Timor-Leste(FDTL), iha loron 16 fulan Dezembru 2011 iha Sentru Treinamentu Nicolau Lobato, Metinaro, Díli, halo graduasaun ba membru foun hamutuk 645, ne’ebé kompostu hosi Ofisial, hamutuk nain 93 Sarjentu, 203 no Prasa hamutuk nain 349.

Majór Jenerál Lere Anan Timur iha nia intervensaun hateten, “Ita-boot sira nia komparénsia previléjiu ida hodi fó sasin iha biban ida ne’e ba eventu boot Joven Timor oan 645 hola ninia konsiénsia matenek inkoorpora iha instituisaun militar, atu defende nia rai, nia Nasaun no nia povu nu’udar filozofia ida asuwain Timor-oan sira nian dezde uluk”.

“Loron ohin  espesiál, tanba ita marka dala ida tan iha perkursu istoria Forsa Armada Timor-Leste nian hafoin ita restaura ita nia independénsia nasionál iha tinan sanulu liubá. Graduasaun ida ohin nu’udar aktu estraordinária ida, tanba ita halo rekuperasaun radikál hodi kompleta fali estrutura Forsa Armada nian, hafoin krize 2006 akontese. Sé ita onestu ne’e la’ós buat fásil,sé ita konfirma loloos opiniaun no opsaun”, esplika Lere Anan Timur.

Prezidente Repúblika, José Ramos-Horta nu’udar Komandante Supremu Falintil-Forsa Defeza Timor-Leste (F-FDTL), hato’o mensajen ba membru foun F-FDTL nian katak “Ita kaer kilat atu fó seguransa dame ba nasaun no povu,ita kaer kilat  laos atu halo povu tauk. Tanba ne’e Estadu nia reponsabilidade tomak hodi labele iha violénsia mai hosi sira ne’ebé kaer kilat, mai hosi Forsa Armada F-FDTL no PNTL”.

Serimónia graduasaun ne’e konta ho prezensa Prezidente Repúblika, José Ramos-Horta, Majór Jenerál Lere Ana Timur, Vise Primeiru-Ministru, José Luis Guterres, Adjuntu Komisáriu PNTL, Afonso de Jesus, Provedór Direitus Umanus no Justisa, Sebastião Dias Ximenes, Prokuradora Jerál Repúblika Ana Pessoa Pinto, Membru Governu no Parlamentu, Korpu Diplomátiku no Família resém-graduadu sira nian.