Governu Timor-Leste

Ministru Saúde Nelson Martins, iha loron 5 fulan Dezembru tinan 2011, iha Distritu Oe-Cusse Ambeno, hala’o sorumutu ho knaar nain saúde sira, estudantes no entidade Distritiál sira hodi hato’o palestra ida ho nia Tema SISCa ka “Revitalizasaun Kuidadus Saúde Primaria Iha Timor-Leste”.

Iha nia Palestra Ministru Saúde Nelson Martins hateten, Responsabilidade Morál no Polítika IV Governu Konstitusionál hodi responde ba nesesidade povu nian iha area Saúde nian mak hanesan agora ita haree dadaun liu hosi programa SISCa no Pasta Mutin.  Nia hatutan “Timor-Leste agora dadaun define komponente ne’en (6) ne’ebé efetivu ba kuidadu Saúde primária hamutuk ho meza ne’en (6) ne’ebé iha SISCa no deskreve oinsá Timor-Leste dezenvolve ho komprensivu iha sistema kuidadu saúde primária, ilustra mós evidensia ne’ebé bele adapta Geografika, Sosiál, no kultural Timor-Leste nian”, tenik nia.

Ministru esplika liutan katak, ho livru  revitalizasaun kuidadus saúde primária ne’e mos bele loke entidades hot-hotu nia hanoin, tanba define ona saida mak servisu saúde distritál sira nia dever, saida mak sentru saúde sira nia servisu no saida mak knaar nain saúde sira bele halo iha Area rurá no urbana, define mós saida mak xefe suku no xefe aldeia sira nia responsabilidade hodi lori asistensia saúde besik liu ba komunidade.

Tanba ne’e SISCa mak hanesan estratéjia Ministériu Saúde nian ne’ebé uza hodi responde ba rekursus umanus ne’ebé limitadu, nune’e mós atu responde ba nesesidade sira IV Governu Konstitusionál nian, oinsá atu tulun komunidade sira ne’ebé hela iha foho leten, area rurais, remotas no dolok ku’ak atu hetan assistensia hanesan mós iha sidade. SISCa hanesan odamatan ba komunidade rurál atu hetan assistensia, SISCa hakbiit komunidade no  profesionais hosi karaik too iha leten ka polïtika “bottom up”. SISCa mos sai hanesan liña koordenasaun entre profesionais Saúde ho komunidade.