Governu Timor-Leste

Governu fó sertifikadu nain ba rai ba komunidade sira iha Distritu Tolu, kompostu hosi Distritu Manatutu, Likisa, no Ainaro, iha Likisa, bainhira selebra Loron Mundiál ba Direitu Umanu nian.

Ministra Justisa lori governu nia naran fó agradesimentu ba komunidade  hotu-hotu ne’ebé mak fó sira nia kontribuisaun, fó sira nia apoiu, fó sira nia krítika hodi hafanu nafatin Governu atu esforsa an nafatin hodi bele servi di’ak liu ita nia komunidade, iha biban ida ne’e ha’u hakarak espesialmente fó agradese mós  ba embaixadora Estadus Unidus Amérika, ho reprezentante hosi USAID, tanba sira nia tulun  mak ba dahuluk loke dalan atu ita hahú sukat komunidade sira nia rai liu hosi projetu ida ne’ebé ita hotu hatene naran “Ita nia rai’’.

Lucia Lobato informa mós katak sai nu’udar faktu ida ba komunidade ne’ebé nain loloos ba rai hodi utiliza, tanba hosi sertifikadu ne’e rasik atu bele rezolve problema rai ne’ebé  mak  durante ne’e mosu iha komunidade nia leet.

Iha fatin hanesan, Primeiru-Ministru Interinu, Jose Luis Guterres, hateten katak “Timor-Leste pelumenus ha’u fiar katak familia tomak  sei iha rai pedasuk ruma,rai barak ne’ebé mai hosi kedan nia beiala sira ne’ebé ohin loron jerasaun ida ne’e sei kaer nafatin, maibé estadu hakarak  fó liu hosi sertifikadu ida ne’e hodi rekoñese ita-boot sira nia direitu ba rai sira ne’e, ida ne’e propriedade ne’ebé mai hosi ita nia avó sira, ita nia beiala sira, haree halo didi’ak ba lalika faan fali”.

Partisipa iha serimónia mak Ministra Justisa, Primeiru-Ministru Interinu José Luís Guterres, Vise Ministru Justisa Ivo Valente, Vise Ministru Ekonomia no Dezenvolvimentu Cristiano da Costa, Sekretariu Estadu Dezastre Naturais Jacinto Rigobertu, Sekretáriu Estadu Formasaun Profisionál no Empregu Bendito Freitas, Diretór PNUD, Nikiku Tanaka, ne’eé reprezenta Reprezentante Espesiál Nasoens Unidas iha Timor-Leste, Reprezentante Sosiedade Sivil, nomós NGO sira seluk.