SEFOPE asina Nota Entendimentu ho Governu Austrália
Governu Timor-Leste, liu hosi Sekretaria Estadu Formasaun Profesionál no Empregu (SEFOPE), ho Governu Austrália, ne’ebé reprezenta hosi embaixadór Austrália iha Timor-Leste, iha loron 1 Dezembru tinan 2011 asina nota entendimentu, kona-ba estabelesimentu Planu Pilotu Traballadór Sazonál (Pacific Seasonal Worker Pilot Scheme - PSWPS).
Nota entendimentu ne’e, ho objetivu atu ofisializa akordu ida entre país rua, hodi Timor-Leste bele hahú prepara ninia traballadór timor-oan ho idade entre 21-45 ne’ebé SEFOPE sei selesiona tuir kritériu no prosesu ne’ebé konkorda ona ho Governu Austrália.
Aleinde ne’e kandidatu trabalhadór sira sei hetan oportunidade atu bá servisu ho empreza Austrália nian iha Broome, Austrália, durante fulan ne’en (6) iha setór turizmu no ospitalidade.
Sekretáriu Estadu Formasaun Profisionál no Empregu (SEFOPE), Bendito Freitas, hateten katak, “Kandidatu Traballadór sira ne’ebé mak atu bá servisu iha Austrália tuir planu iha inísiu Marsu tinan oin 2012, traballadór sira tenke hatudu atitude di’ak, atu nune’e iha futuru, bele loke dalan ba traballadór sira seluk hodi bá servisu iha Austrália no mós bele hatudu imájen di’ak Timor-Leste nian ba mundu”.
Iha fatin hanesan Embaixadór Austrália ba Timor-Leste hatutan katak, nia lori Governu Austrália nia naran haksolok tebe-tebes ho serimónia asina nota entendimentu ho Governu Timor-Leste tanba nia fiar katak momentu ida ohin ne’e, ema hotu-hotu hein kleur tebe-tebes. Maibé ita hotu tenke iha pasiénsia uituan, tanba Governu Austrália ho SEFOPE haka’as-an maka’as hodi prepara ezbosu ba planu servisu hamutuk, molok Governu rua, Austrália no Timor-Leste atu asina nota entendimentu.
Akordu ne’ebé asina, ne’e ninian validade ba fulan ne’en (6) ne’ebé sei remata iha fulan Jullu 2012. Tuir planu, kandidatu traballadór hamutuk 20 mak atu bá uluk servisu iha Broome Austrália. No kandidatu traballadór sira ne’e sei tuir formasaun iha área ospitalidade no turizmu iha Timor-Leste no mós sira hetan formasaun iha Austrália ho sistema On Arrived Training.
