Governu Timor-Leste

Prezidente Repúblika Timor-Leste, José Ramos-Horta, iha loron 28 fulan Novembru, iha oras 00.00,  halo inaugurasaun ba faze dahuluk kona-ba funsionamentu Sentrál Elétrika Hera nian no liña transmisaun Kosta Norte iha País ne’e.

Serimónia inaugurasaun ne’e hahú ho kanta Ino Nasionál “Patria, Patria”, diskursu hosi Prezidente Repúblika, loke filme dokumentária no karega butaun atu halakan ahi.

“Ohin ita hamrik iha fatin ne’e atu halo inaugurasaun faze dahuluk Sentral Elétrika Hera,ne’ebé hahú prosesu ida, dezenvolvimentu modernizasaun ita nian rain no bele ona fornese ahi durante oras rua nulu-resin haat nia laran ba povu iha parte norte ita nian Pais nian”, hateten José Ramos-Horta.

Prezidente haktuir tan katak “Tuir loloos ema ida ne’ebé mak ohin kalan hamrik hamutuk ho ita iha fatin ne’e, mak Primeiru-Ministru, Kay Rala Xanana Gusmão. Tanba nia halo hela tratamentu ba nia saúde iha Singapura, nia labele marka nia prezensa iha fatin ida ne’e. Maibé ha’u nia parabéns ba Primeiru-Ministru, ba Governu, ba Ministru Infraestrutura, ba Sekretáriu Estadu Eletrisidade Água no Urbanizasaun no parabéns ba enjeñeiru sira hosi estranjeiru no timor-oan sira, tanba sira hotu nia haka’as -an ohin ita konsege halo serimónia inaugurasaun ida ne’e”.

Marka prezensa iha serimónia inaugurasaun ne’e, aleinde Prezidente Repúblika, José Ramos-Horta, marka prezensa mós, Prezidente Parlamentu Nasionál, Fernando Lasama de Araújo, Prezidente Tribunál Rekursu, Claudio Ximenes, Vise Primeiru-Ministru, José Luis Guteres, membru Parlamentu Nasionál, Membru Governu, Vigáriu Jerál Dioseze Díli, Apolinário Guterres, Korpu Diplómatiku no konvidadu sira seluk.