Semináriu kona-ba “inflation and regional economic outlook”
Ministériu Finansa liu hosi Diresaun Jerál Análize no Peskiza ho Misaun Fundu Monitária Internasionál, (FMI), iha loron 24 Novembru 2011, iha salaun Ministériu Finansa, hala’o semináriu ida kona-ba “Inflation and Regional Economic Outlook”.
Diretór Jerál, Diresaun Jerál ba análize no peskiza, Ministériu Finansa nian, António Freitas, iha nia intervensaun, bainhira loke semináriu ne’e hateten katak “FMI nia misaun ne’e importante tebes ba Timor-Leste, tanba ho misaun ne’e sira halo hanesan avaliasaun ba progresu ekonómiku ne’ebé mak ita hala’o iha tinan ida nia laran, ne’ebé envolve mós kuadru tékniku sira hosi Ministériu finansa nian, envolve mós ONG, média, nomós akadémiku sira kona-ba progresu ekonómiku ne’ebé mak ita iha ona.
Diretór Jerál ne’e hatuir katak “FMI fó hanoin ba ita mak inflasaun ita nian ne’ebé boot tebes, liuliu iha fulan Setembru ne’e, inflasaun ita nian to’o 13,8%, tanba inflasaun ne’ebé boot, ita haree katak iha Timor hanesan tama iha low income country seidauk fó afetasaun ne’ebé mak boot ba ita nia ekonomia no dala ida tan FMI laiha objesaun ida ba governu atu tau orsamentu iha fundu infraestrutura tanba ita presiza duni atu bele halo hanesan aranke ba dezenvolvimentu iha Timor-Leste”.
Diretór ne’e informa mós katak, “kestaun ne’ebé mak ohin foti liuliu ba iha ita nia parte tanba ita haree katak FMI ninia rekomendasaun iha misaun, sira haree katak Governu halo investimentu ida ne’ebé di’ak ba orsamentu jerál estadu nian no investimentu barak liu mak aloka iha infraestrutura, no metodolojia ne’ebé mak ita hili, tuir hanesan ho nasaun sira seluk, mak metodolojia internasionál atu bele hetan informasaun globál,la’ós informasaun parsiál de’it hosi Governu”.
