Governu Timor-Leste

Atleta Timor-Leste nian ne’ebé partisipa iha eventu internasionál Sea Games ba dala XXVI, iha Indonézia, oferese medalla osan mean ida, medalla prata ida no medalla bronze 6 mai Timor-Leste. Medalla sira ne’e oferese hosi Atleta sira ho modalidade, Kempo no Taekwondo. Modalidade Kempo oferese medalla osan mean ida, prata ida no bronze 5 no Taekwondo oferese medalla bronze ida.

Sekretáriu Estadu Juventude no Desportu hato’o ninia parabéns ba atleta tomak ne’ebé mak partisipa iha ventu Sea Games, hodi dehan ba sira ne’ebé la manán, “la signifika lakon, maibé ne’e hanesan liafuan Indonézia nian hateten “kemenangan yang tertunda”. Ne’e duni tenke haka’as an atu iha tinan oin bele hetan mós medalla.

Ba modalidade Kempo ne’ebé hetan osan mean, la haluha hato’o ninia parabéns tanba ho rekursu no preparasaun ne’ebé iha konsege oferese duni medalla osan mean ida ba povu Timor-Leste. Ho ida ne’e mak ema dehan, maske ita foin mak hamrik ita mós bele hatudu ba sira katak, Timor-Leste bele.

Julianto Danabere, atleta hosi modalidade Kempo ne’ebé oferese Medalla osan mean hateten “Ami hato’o agradesimentu boot ba povu Timor-Leste ne’ebé mak fó ona apoiu. Ami sente urgullu tanba rezultadu ne’e la’ós ba de’it ba Federasaun Kempo maibé prémiu ne’e ba Povu Timor-Leste”.

Atleta sira ne’ebé partisipa iha eventu Sea Games ne’e, kompostu husi modalidade sanulu resin-rua, hanesan, Taekwondo, iha atleta nain  8, Karate nain 9, Tenis Meja nain 5, Silat Timor-Leste nain 13, Badminton nain 5, Boxing atleta nain 8, Foti Besi nain haat 4, Voleiból nain 7, Atletizmu  nain 9 no Futeból  sanulu resin-haat, Ciklista nain 5 no modalidade Kempo hamutuk atleta nain 16.