Validasaun ba Relatóriu Espesifíku CEDAW
Sekretaria Estadu Promosaun Igualdade (SEPI), loron 23 Novembru 2011 iha salaun otél Arbiru, Dili, hala’o sorumutu kona-ba Validasun ba relatóriu Espesifíku CEDAW (Committee on the Elimination of Discrimination against Women), ho objetivu atu halo validasaun ba relatóriu ne’ebé Grupu traballu CEDAW ezbosu tiha ona, hodi hetan komentáriu ka koresaun hafoin haruka ba Komite CEDAW.
Iha sorumutu ne’e Diretór Polítika Dezenvolvimentu Jenéru (DPDG), Armando da Costa hateten katak, “iha tinan rua liubá, iha 2009 Governu Timor-Leste bá aprezenta ita-nia relatóriu inísiu kona-ba CEDAW nian iha Nova Iorque ne’ebé ita ko’alia kona-ba área barak inklui área saúde no edukasaun, hafoin hosi komite CEDAW hasai fali rekomendasaun ida mai Timor-Leste, entre rekomendasaun ba área oin-oin ne’e mak área saúde no área edukasaun sai área ida ne’ebé sira fó prioridade atu ita hato’o fila fali relatóriu progresu ba tinan rua nian.
Diretór ne’e informa tan katak, tuir loloos aprezentasaun kada tinan haat, maibé sira haree asuntu balun ne’ebé presiza hato’o fali hafoin tinan rua, agora 2011, ita presiza submete fali relatóriu iha área rua ne’e. Rekomendasaun lubuk ida ne’ebé hato’o mai iha saúde nia númeru mak 37 no 38, nune’e mós, edukasaun nian iha númeru 35 no 36 no sei iha área seluk ne’ebé ita sei halo ninia relatóriu iha tinan oin mai ita prepara no sei hato’o fila fali ba iha komite CEDAW.
Bazeia ba rekomendasaun hirak ne’e mak hahú fulan Fevereiru tinan ida ne’e, SEPI servisu hamutuk ho ministériu saúde, edukasaun hodi foti informasaun no dadus atu ita halo relatóriu hafoin submete ba iha membru komite CEDAW, dehan Nia.
Partasipa iha sorumutu ne’e reprezentante UNDP, Jender UNMIT, reprezentante Rede Feto, reprezentante Ministériu Saúde no edukasaun, no mós instituisaun relevante ne’ebé involve an iha área saúde no edukasaun.
