Governu Timor-Leste

Ministériu Saúde iha loron 19 Novembru hala’o serimónia graduasaun no juramentu ba estudante medisina, parteira no enfemeiru sira iha salaun apuramentu CNE Kolmera Díli.

Graduandu sira ne’e kompostu hosi estudante Medisina Hipokrátika nain limanulu resin haat (54), lisensiatura médiku jerál báziku, hamutuk estudante tolunulu resin ne’en (36), baxarelatu enfarmajen tolunulu resin hitu (37) no baxarelatu parteira nain atus ida ruanulu resin hitu (127).

Ministru Saúde, Nelson Martins, hateten “ohin loron hanesan orgullu boot ida ba ita hotu no loron ida ne’e espesiál tebes ba Ministériu Saúde tanba ohin Ministériu Saúde marka tan istória foun no boot tanba hala’o tan graduasaun ba parteira no enfermeiru sira ne’ebé foin ba dahuluk iha Timor-Leste”.

Ministru ne’e hatutan tan katak “ho graduasaun ne’e signifika katak ita Timor-oan mak sai duni mestre ba ita-nia maluk no hanesan servidór ba ita-nia Nasaun rasik, aleinde ne’e aumenta tan profisionál saúde foun ne’ebé prontu ona hala’o servisu iha kualkér tempu ne’ebé Governu presiza’.

Reitór UNTL, Aurélio Guterres, iha ninia diskursu hateten ohin Universidade husik ona ninia estudante sira fila fali ba sosiedade no odamatan Universidade sei la taka ba ema sira ne’ebé mak iha vontade hakarak kontinua atu hasai ninia Maestradu no doutoramentu. Nia informa tan katak “dezafiu akadémiku imi liu tiha ona buat barak, maibé agora dezafiu foun ne’ebé imi sei enfrenta mak oinsá imi moris hamutuk ho ita nia sosiadade”.

Marka prezensa iha serimónia gradusaun ne’e, aleinde Ministru Saúde, Nelson Martins no Reitór UNTL, Aurélio Guterres, iha mós, Ministru Edukasaun, João Câncio Freitas, reprezenta Vise Primeiru-Ministru, Eis Primeiru-Ministru iha Primeiru Governu Konstitusionál, Marí Bim Amude Alkatiri, Eis Vise Ministru Saúde, Luis Lobato, Dekanu Fakuldade Medisina no Siénsia Saúde, João Martins, korpu diplomátiku, estrutura UNTL no familia graduandu sira.